რუსთავის საქალაქო სასამართლომ სახელმწიფო ქონების თაღლითური გზით დაუფლების ბრალდებით დაკავებულ მარნეულის საკრებულოს თავმჯდომარის ყოფილ პირველ მოადგილე გია დორეულს, აუდიტორულ კომპანია "აუდიტ ესკორტის" დირექტორ მინდია ტაბაღუასა და მოქალაქე დავით ქოროღლიშვილს დღეს, აღმკვეთ ღონისძიებად, გირაო შეუფადა.
როგორც პროკურორმა დავით ჩხარტიშვილმა განაცხადა, წინასწარი დაკავების იზოლატორში სამივე ბრალდებული კიდევ ერთხელ დაიკითხა. მათგან დორეულმა და ქოროღლიშვილმა წაყენებული ბრალი აღიარეს და გამოძიებასთან თანამშრომლობას დათანხმდნენ. აქედან გამომდინარე, პროკურატურამ სამივე ბრალდებული წინასწარი დაკავებიდან გაათავისუფლა და სასამართლოში აღმკვეთ ღონისძიებად პატიმრობის შეფარდება გირაოთი შეცვალა. მართალია ტაბაღუა წაყენებულ ბრალს არ აღიარებს, მაგრამ მისი მიმალვის საფრთხე არ არსებობს და მისთვისაც გირაოს შეფარდებას მოითხოვენ.
პროკურორმა დავით ჩხარტიშვილმა გია დორეულისა და დავით ქოროღლიშვილისთვის 20-20 ათასი ლარის ოდენობის გირაოს შეფარდება მოითხოვა. ხოლო მინდია ტაბაღუასათვის - 10 ათასი ლარის.
დორეულისა და ქოროღლიშვილის ადვოკატებმა გირაოს თანხის 10 ათას ლარამდე შემცირება მოითხოვეს, ხოლო მინდია ტაბაღუას ადვოკატებმა -აღმკვეთი ღონისძიების საერთოდ მოხსნა.
როგორც მინდია ტაბაღუას ადვოკატმა, ამირან გიგუაშვილმა განაცხადა, მისი დაცვის ქვეშ მყოფი წაყენებულ ბრალს არ აღიარებს და მიიჩნევს, რომ მის მიერ გაცემული აუდიტორული დასკვნა, რომელიც მარნეულის ცენტრში ყოფილი პოლიციის შენობისა და ტერიტორიის შეფასებას ეხებოდა, შესაბამისობაშია საერთაშორისო სტანდარტებთან, ხოლო სამხარაულის ექსპერტიზის ეროვნული ბიუროს მიერ გაცემული დასკვნა არ შეესაბამება რეალობას.
"მინდია ტაბაღუას დაკავების პროცესიდან დაწყებული, ადგილი აქვს მის მიმართ უკანონობას, ზეწოლის მცდელობას, რაც გამოიხატება იმაში, რომ ის ადვოკატებთან ერთად აპირებდა მორიგი ჩვენების მიცემას და გამოძიებასთან აქტიურად თანამშრომლობდა, ის ქუჩაში დააკავეს, თითქოს მიმალვას აპირებდა და გადაუდებელი აუცილებლობიდან გამომდინარე იქნა დაკავებული," - განაცხადა ამირან გიგუაშვილმა.
მინდია ტაბაღუას მეორე ადვოკატის, ლადო სანიკიძის თქმით კი, ტაბაღუას მხოლოდ პირადობის მოწმობა აქვს და საზღვარგარეთის პასპორტის გარეშე ქვეყნიდან ვერ მიიმალება.
საგამოძიებო სამსახურმა დორეული, ქოროღლიშვილი და ტაბაღუა მარნეულის ცენტრში სახელმწიფო ქონების, კერძოდ, ყოფილი პოლიციის შენობისა და ტერიტორიის თაღლითურად დაუფლების ბრალდებით ორი დღის წინ დააკავა. გამოძიება სსკ 180-ე მუხლის მეორე და მესამე ნაწილებით მიმდინარეობს, რაც 6-9 წლამდე თავისუფლების აღკვეთას ითვალისწინებს. მორიგი სასამართლო პროცესი აღნიშნულ საქმეზე 19 სექტემბერს გაიმართება.
