საქართველოს საგარეო საქმეთა მინისტრის, მაია ფანჯიკიძის თქმით, საქართველოს  ამერიკის შეერთებული შტატების მთავრობის მხრიდან დიდი ნდობა აქვს. აღნიშნული განცხადება ფანჯიკიძემ ათასწლეულის გამოწვევის კორპორაციისა და საქართველოს მთავრობის ხელშეკრულებაზე ხელმოწერის შემდეგ გააკეთა.

დღეს გაფორმებული ხელშეკრულება, რომლის თანახმად, საქართველოს განათლების სექტორისთვის 140 მილიონი დოლარის გამოიყოფა, მისი შეფასებით, უაღრესად მნიშვნელოვანია.
"განათლება არის  საზოგადოების განვითარების საფუძველი. აქედან გამომდინარე,  სწორად მიმაჩნია, რომ სწორედ განათლების სექტორს მოხმარდება მეორე კომპაქტი, რომელიც საქართველომ დღეს მიიღო. ეს ნიშნავს, რომ საქართველოს აქვს დიდი ნდობა ამერიკის შეერთებული შტატების მთავრობისგან, რადგან ეს არის მთავრობის მიერ გამოყოფილი ფული და ჩვენ ძალიან მადლიერები ვართ ამერიკელი ხალხის, ამერიკის მთავრობის, რომ ეს კომპაქტი საქართველომ მიიღო და აღმასრულებელმა დირექტორმა დანიელ იოჰანესმა საქართველოში ჩამოიტანა, რაც გაცხადდა ხელმოწერით ეროვნულ ბიბლიოთეკაში", - განაცხადა მაია ფანჯიკიძემ ჟურნალისტებთან საუბრისას.
ჟურნალისტები საქართველოს საგარეო საქმეთა მინისტრისგან დავით გარეჯის სამონასტრო კომპლექსში არსებული ვითარებითაც დაინტერესდნენ. ფანჯიკიძის განცხადებით, მას დავით გარეჯიდან უახლესი ინფორმაცია არ აქვს, რადგან საქართველოში დღეს დილით დაბრუნდა, თუმცა მინისტრის განმარტებით, საქართველოს აზერბაიჯანულ მხარესთან კონსულტაციები მუდმივად აქვს  ყველა თემაზე, რომელიც შეიძლება  მოსაგვარებელი იყოს. 
"მე ამას არ დავარქმევდი პრობლემებს, რადგან ჩვენ ვართ პარტნიორები, მეგობრები და ყველანაირი პრობლემის მოგვარება შეგვიძლია", - განაცხადა მაია ფანჯიკიძემ.