პრემიერ-მინისტრ ბიძინა ივანიშვილის განცხადებით, "პრეზიდენტი აღარ აკონტროლებს რას ამბობს და მხოლოდ კრიტიკულ გამონათქვამებზე ჩერდება".
ამის შესახებ ივანიშვილმა "აჭარის" ტელევიზიის ეთერში, გადაცემა "სამართალი ხალხისთვის" მიცემულ ინტერვიუში განაცხადა.
"პრეზიდენტი მგონი, აღარ აკონტროლებს რას ამბობს და მხოლოდ კრიტიკულ გამონათქვამებზე ჩერდება, თუმცა ის ოპოზიციაშია და ამაში არ არის გასაკვირი, შეუძლია, გვაკრიტიკოს. საინტერესო იქნებოდა, მისი კრიტიკა უფრო კონსტრუქციული იყოს, რომელიც ჩვენს გუნდსაც წაადგებოდა და ქვეყენასაც."-განაცხადა პრემიერმა.
ივანიშვილმა ვიზიტებთან დაკავშირებითაც გააკეთა კომენტარი და აღნიშნა, რომ ყველაფერი დაბალანსებულად მიმდინარეობს, სექტემბრამდე კი განსაკუთრებული ვიზიტები არ იგეგმება.
„რაც შეეხება ვიზიტებს, ვფიქრობ, რომ ყველაფერი დაბალანსებულად მიმდინარეობს, მათ შორის, ჩემი ვიზიტებიც. ძირითადი პრობლემები შიგნით გვაქვს ქვეყანაში და მთავარი და განმსაზღვრელი ჩვენი პოლიტიკის შემფასებელი ჩვენი საზოგადოება იქნება და არა ისე, როგორც წინა ხელისუფლება ცდილობდა, საკუთარ საზოგადოებას იგნორს უკეთებდა და შეფასებები ამერიკიდან და ევროპიდან მოჰქონდათ. ასე აღარ იქნება," - განაცხადა ივანიშვილმა.
