მიხეილ სააკაშვილმა უკრაინულ „მე-5 არხს" ინტერვიუ მისცა. საქართველოს ექსპრეზიდენტმა ქვეყანაში არსებულ მდგომარეობაზე ისაუბრა და უკრაინისა და კრემლის ურთიერთობებზე გაამახვილა ყურადღება.
მისი თქმით, პუტინი უკრაინას ძალიან ბევრ ცუდ რამეს დაპირდა. „პუტინისთვის უკრაინა არის ტერიტორია, მან ნატო-ს სამიტზე, რომელსაც მე ვესწრებოდი, 2008 წელს ბუქარესტში პირველად თქვა, რომ უკრაინა არ არის ქვეყანა, ეს არის ტერიტორია. მას შემდეგ ამას იმეორებს ყველა შეხვედრაზე და არა მხოლოდ იმეორებს, ახორციელებს კიდეც. ახლა გაჩნდა ახალი რუკა, სადაც უკრაინა გახლეჩილია ორ ნაწილად - აღმოსავლეთ და დასავლეთ უკრაინად. ეს არის ბლეფი, რუსეთი ცდილობს ეს ბლეფი დასავლეთს თავს მოახვიოს. თან ეს არის მზადება უკრაინის შემდგომი გახლეჩისთვის. საქართველოს მაგალითზე შეგვიძლია ვთქვათ, რომ რუსეთი ტყუილად არაფერს ამბობს, თუ მუქარას აგზავნის, ახორციელებს კიდეც. ერთხელ მან მითხრა, თქვენი მეგობრები ევროპაში ბევრ კარგ რამეს გპირდებიან, მაგრამ ვერაფერს შეასრულებენ, მე კი კარგს არაფერს გპირდებით, მაგრამ ყოველთვის ვასრულებო. ის ძალიან ბევრ ცუდ რამეს დაპირდა უკრაინას", - განაცხადა სააკაშვილმა.
