„ფორსაჟი-7"-ის გადამღებმა ჯგუფმა გადაწყვიტა, აღარ მოიფიქრონ ახალი სცენარი პოლ უოკერის გმირის დაღუპვისთვის და ფილმში ვიდეორეგისტრატორის მიერ გადაღებული რეალური კადრები და ავარიის ადგილზე გადაღებული ფოტოები გამოიყენონ.
სცენარში პოლ უოკერის გმირი მეგობართან ერთად მანქანაში ჩაჯდება და შემდეგ მოხდება ის, რაც რეალურად მოხდა. პროდიუსერები დარწმუნებული არიან, რომ ფილმი არა მარტო პატივს მიაგებს მსახიობის ხსოვნას, არამედ ფრანშიზის ყველაზე შემოსავლიანი ფილმი გახდება.
ამასთან, უკვე ცნობილია, რომ სოციალურ ქსელში დაგეგმილი შეხვედრის მიხედვით, დაღუპული მსახიობის 7 ათასზე მეტი თაყვანისმცემელი შეიკრიბება ამ კვირას უოკერის გარდაცვალების ადგილას. ამ ფაქტთან დაკავშირებით ადგილობრივმა ხელისუფლებამ უკვე გააფრთხილა მოსახლეობა, რომ მოსალოდნელია საცობების წარმოქმნა.
გამოიკვეთა ექსპერტიზის დასკვნის შედეგებიც: ცნობილი გახდა, რომ პოლ უოკერის მეგობარი, რომელიც „პორშეს" საჭესთან იჯდა, შეჯახებისთანავე დაიღუპა, უოკერი კი რამდენიმე წუთით გვიან - მისი სიკვდილის მიზეზი ტრამვასთან ერთად დამწვრობაც გახდა.
შეგახსენებთ, ამერიკელი მსახიობი, პოლ უოკერი,რომელმაც ფილმ „ფორსაჟით" გაითქვა სახელი, ერთი კვირის წინ, 40 წლის ასაკში, ავტოავარიაში დაიღუპა. შემთხვევა კალიფორნიის ქალაქ სანტა-ბარბარაში მოხდა.
