ქართველ ჟურნალისტებს უკრაინიდან დეპორტაცია ემუქრებათ. უკრაინული ოპოზიციის წარმომადგენლების განცხადებით, ისინი უშიშროების სამსახურს გადაწყვეტილების დასაბუთებას სთხოვენ.
შეგახსენებთ, რომ ტელეკომპანია „ტაბულას" გადამღებ ჯგუფს უკრაინის უშიშროებისა და საემიგრაციო სამსახურის თანამშრომლებმა ქვეყნის დატოვება მოსთხოვეს.
როგორც „ტაბულას" ჟურნალისტმა დიმიტრი ავალიანმა განაცხადა, მათ ზეპირი ფორმით აუხსნეს, რომ ქვეყანა ერთი დღის განმავლობაში უნდა დატოვონ, წინააღმდეგ შემთხვევაში, ბრალს მასობრივი არეულობების მონაწილეობაში დასდებენ და ქვეყნიდან დეპორტით გამოუშვებენ.
„მათ ზეპირად გამაცნეს დადგენილება, რომელსაც მათი თქმით, ხელს უშიშროების სამსახურის უფროსის მოადგილე აწერს. დადგენილების თანახმად, ჩვენ გვეკრძალება ქვეყანაში შემოსვლა და ერთი დღის ვადაში უნდა დავტოვოთ", - განაცხადა დიმიტრი ავალიანმა.
როგორც ცნობილია, სპეცსამსახურები სხვა ქართველი ჟურნალისტების კოორდინატებითაც დაინტერესდნენ, რათა მათ ანალოგიური გადაწყვეტილების შესახებ აცნობონ.
