საქართველოს საგარეო საქმეტთა სამინისტრო ცხინვალის საოკუპაციო ხაზის გასწვრივ საზღვრის აღმნიშვნელი ბანერების დამონტაჟებასთან დაკავშირებით განცხადებას ავრცელებს.
განცხადებაში აღნიშნულია, რომ უკანასკნელ პერიოდში ბანერების მოწყობა მოხდა ქარელის რაიონულ სოფლებში: კნოლევი, ავლევი, ცერონისი, ღოღეთი, დირბი. ასევე ბანერები აიწყო გორის რაიონის სოფლებშიც: ერგნეთი, დიცი, ქერე, ფლავი, ფლავისმანი, მეჯვრისხევი, ციცაგიანთკარი და ზემო ნიქოზი.
„რუსეთის საოკუპაციო ჯარის ქმედებები უხეშად არღვევს საოკუპაციო ხაზის მიმდებარე ტერიტორიაზე მცხოვრები მოსახლეობის ფუნდამენტურ უფლებებსა და თავისუფლებებს, რაც სავალალო ჰუმანიტარულ შედეგებს იწვევს.
საგარეო საქმეთა სამინისტრო გმობს რუსეთის პროვოკაციულ პოლიტიკას საქართველოს წინააღმდეგ - საერთაშორისო ვალდებულებებისა და ცეცხლის შეწყვეტის შეთანხმების სრული უგულვებელყოფით, რომელიც განსაკუთრებულ შეშფოთებას იწვევს მოსკოვის მხრიდან ძალის გამოუყენებლობის ვალდებულების აღებაზე უარის თქმის გათვალისწინებით.
საგარეო საქმეთა სამინისტრო დიდად აფასებს საერთაშორისო თანამეგობრობის მტკიცე პოზიციას რუსეთის ქმედებების უკანონობასთან დაკავშირებით და მოუწოდებს საერთაშორისო ორგანიზაციებს და პარტნიორ სახელმწიფოებს, განაგრძონ ეფექტური ზომების მიღება საქართველოს სუვენერულ ტერიტორიაზე საგანგაშო პროცესების აღსაკვეთად", - ნათქვამია საგარეო საქმეთა სამინისტროს განცხადებაში.
