„ლარის კურსის ცვალებადობაში უჩვეულო და საგანგაშო არაფერია", - განაცხადა ფინანსთა მინისტრმა ნოდარ ხადურმა.

მისი თქმით, დეკემბერში ლარზე მოთხოვნის გაზრდა ძალიან ბევრი მიზეზის გამოა განპირობებული.

„კიდევ ერთხელ ვადასტურებ, ყველა ინსტრუმენტი არსებობს იმისთვის, რომ საქართველოში ყველაფერი იყოს პროგნოზირებადი. რაც ძალიან მნიშვნელოვანია, ლარის კურსის ცვალებადობაში უჩვეულო არაფერია. თქვენ, თუ გადახედავთ მეზობელი ქვეყნების ვალუტებს, ნახავთ, რომ ასევე არის რყევა, რაც ჩვეულებრივი მოვლენაა ეკონომიკაში. ასე, რომ არაფერი საგანგაშო აქ არ არის", - აღნიშნა ფინანსთა მინისტრმა.

მისივე ვარაუდით, ფასების ზრდა მოსალოდნელი არ არის, რადგან ბაზარი საკმაოდ გაჯერებულია.
ლარის კურსი ევროსთან მიმართებაში 243 პუნქტით დაეცა. BPN-ის ინფორმაციით, ლარის ოფიციალური გაცვლითი კურსი გუშინ დოლართან მიმართებაში სარეკორდო მაჩვენებლით, 134 პუნქტით დაეცა და 1.7196 ნიშნულს მიაღწია. ლარის ასეთი დაბალი ღირებულება ბოლოს 2011 წლის მარტში დაფიქსირდა.