„შოთა მალაშხიამ ჯობია კრიტიკულად შეაფასოს თავისი პარტიის და პირადად საკუთარი ნამოღვაწარი და აქედან გამომდინარე გააკეთოს განცხადებები."-ასე შეაფასა „რეპორტიორთან" საუბარში საპარლამენტო უმრავლესობის წევრმა, გიორგი ვოლსკიმ შოთა მალაშხიას ის განცხადება, რომლის მიხედვითაც, ხელისუფლება სამოქალაქო დაპირისპირების ინსპირირებას გეგმავს. „სამწუხაროდ თვითონ დათესეს დაპირისპირების თესლი საზოგადოებაში და ახლა იმკიან."- განაცხადა გიორგი ვოლსკიმ. მისი თქმით, ახალი ხელისუფლება კატეგორიულად ეწინააღმდეგება, რომ საზოგადოებაში აგრესია იყოს, მაგრამ როგორც უმრავლესობის წარმომადგენელი აღნიშნავს, არსებობს გამოხატვის თავისუფლება, რომელიც გარკვეულ საზღვრებს არ უნდა სცილდებოდეს. ვოლსკიმ განმარტა, რომ ის აქციები, რომელიც „ნაციონალური მოძრაობის" პრაიმერის დრო იმართება, „ქართული ოცნების" ინტერესებს ვნებს. „თვითონ ეს პრაიმერიც ხელოვნური სპექტაკლის შთაბეჭდილებას ტოვებს და აღიზიანებს საზოგადოებას, თუმცა ვიმეორებ, აგრესიის ის ფორმა, რომელიც, თუნდაც ზუგდიდში იყო გამოხატული, ქართული ოცნების სტრატეგიასა და ინტერესებს ვნებს."- განაცხადა უმრავლესობის წარმომადგენელმა. შეგახსენებთ, „ნაციონალური მოძრაობის" პრაიმერი დღეს თბილისში, საგამოფენო ცენტრ "ექსპო-ჯორჯიაში" იმართება, რომლის მიმდებარე ტერიტორიაზეც არასამთავრობო ორგანიზაციები საპროტესტო აქციას მართავენ. „ნაციონალური მოძრაობის" წარმომადგენელის, შოთა მალაშხიას თქმით კი, ხელისუფლება სამოქალაქო დაპირისპირების ინსპირირებას აპირებს.
