ვიქტორ იანუკოვიჩმა ოპოზიციის ლიდერებს მრგვალ მაგიდასთან დასხდომა გუშინ საღამოს საჯაროდ შესთავაზა. ამის შესახებ უკრაინის პრეზიდენტის ოფიციალურ ვებგვერდზე განთავსებულ განცხადებაშია ნათქვამი.
ვიქტორ იანუკოვიჩი აცხადებს, რომ ერთადერთი შესაძლო გზა დაზავება და ურთიერთგაგებაა.
„ყველა მხარის ქმედება მხოლოდ კანონისა და უკრაინის კონსტიტუციის ჩარჩოებში უნდა მოექცეს", - აცხადებს იანუკოვიჩი.
უკრაინის პრეზიდენტი ყველა პოლიტიკური ძალის, საზოგადოებრივი ორგანიზაციების წარმომადგენლებს და სასულიერო პირებს საერთო ეროვნული დიალოგისკენ მოუწოდებს.
"მზად ვარ, ასეთ მრგვალ მაგიდაში მონაწილეობისთვის. კომპრომისის მისაღწევად ოპოზიციას მოვუწოდებ, არ თქვას უარი და არ წავიდეს წინააღმდეგობისა და ულტიმატუმების გზით", - ნათქვამია უკრაინის პრეზიდენტის მიმართვაში.
იანუკოვიჩი ირწმუნება, რომ ხელისუფლება კანონის ჩარჩოებში იმოქმედებს და მშვიდობიანი შეკრებების წინააღმდეგ ძალას არასოდეს გამოიყენებს.
"როგორც უკრაინის პრეზიდენტი და კონსტიტუციის გარანტი, გავაკეთებ ყველაფერს რაც აუცილებელია ქვეყნის ნორმალური ფუნქციონირებისთვის, ყოველი მოქალაქის უფლებებისა და ინტერესების დასაცავად, ჩვენს სახელმწიფოში მშვიდობისა და სიმშვიდის უზრუნველსაყოფად", - ნათქვამია იანუკოვიჩის მიმართვაში.
