დღეს, ელისო ბოლქვაძის საქველმოქმედო ფონდი „ლირა", პარიზში ორ ქართველ ტალანტს - ბარბარე თათარაძეს და ილია ლომთათიძეს ფრანგული საზოგადოების წინაშე წარადგენს.

ფონდ „ლირას" ექსკლუზიური კონცერტი, "SOS Talents Foundation - Michel Sogny"-სთან ერთად ხორციელდება. კონცერტი პარიზში, ელისეის მინდვრების პრესტიჟულ დარბაზში გაიმართება. 

10 წლის ილია ლომთათიძე და ბარბარე თათარაძე საფრანგეთის მაღალი საზოგადოების წინაშე რთული სოლო პროგრამით გამოვლენ. სოლო გამოსვლის გარდა, პატარა ვირტუოზები რამდენიმე მუსიკალურ ნომერს ოთხ ხელში შეასრულებენ. 

„ლირა" მჭიდროდ თანამშრომლობს საერთაშორისო ფონდთან "SOS Talents Foundation - Michel Sogny," რომელსაც საქართველოში უკვე კარგად იცნობენ. "SOS Talents"-მა უკვე ბევრ ქართველ ახალი თაობის პიანისტს მისცა საშუალება  გაეკაფათ გზა საერთაშორისო ასპარეზისკენ.

გალა კონცერტს პარიზში საქართველოს კულტურისა და ძეგლთა დაცვის მინისტრი - ბატონი გურამ ოდიშარია დაესწრება.

ელისო ბოლქვაძემ საქველმოქმედო ფონდი „ლირა" 2012 წელს საქართველოში დააარსა. ფონდი მიზნად ისახავს ახალგაზრდა ნიჭიერი, ქართველი ტალანტების აღმოჩენას და განვითარებას. ფონდი „ლირა" მნიშვნელოვანი ტრამპლინია მათი ნიჭის გამოსავლენად საერთაშორისო ასპარეზზე. ასევე, „ლირა" თანამშრომლობს ბათუმის სამუსიკო სკოლასთან, სადაც პიანისტი ელისო ბოლქვაძე აწყობს მასტერ-კლასებისა და შესარჩევ მოსმენებს.