საპარლამენტო უმცირესობის წარმომადგენლის, გიგი წერეთლის განცხადებით, წუხელ მთაწმინდაზე მომხდარი ავტოსაგზაო შემთხვევის დროს, მოტოციკლეტი დაეჯახა ავტომანქანას და არა პირიქით. „ჩემი შვილი მეგობრის მანქანით თბილისიდან მიდიოდა, ზემოდან კი ბაიკერების კოლონა მოდიოდა. ერთ-ერთი მოტოციკლი გზის საწინააღმდეგო მონაკვეთზე დიდი სიჩქარით გადმოვიდა და მანქანას დაეჯახა. ტრაგედიაა, რომ დაიღუპა ახალგაზრდა. მსუბუქად დაშავდნენ ჩემი შვილი და მისი მეგობრები. ამ ავტოსაგზაო შემთხვევას ბევრი თვითმხილველი ჰყავს. მიმდინარეობს გამოძიება და მიცემული ჩვენებებით დასტურდება, რომ მოტოციკლეტი დაეჯახა მანქანას და არა პირიქით", - აღნიშნა გიგი წეეთელმა. მისივე ინფორმაციით, ნუგზარ წერეთელი უმნიშვნელოდ იყო ნასვამი. „ჩემ შვილს ლუდი ჰქონდა დალეული და ის უმნიშვნელოდ იყო ნასვამი. მისი მდგომარეობა ავტოსაგზაო შემთხვევას ვერ გამოიწვევდა. ნაწილობრივ გამოძიება უკვე ჩატარებულია და ისევ გრძელდება საგამოძიებო პროცესი. მირეკავენ და მეუბრებიან, რომ ეს ყველაფერი პოლიტიკურ ზეწოლას ხომ არ უკავშირდებაო... კატეგორიულად ვაცხადებ, რომ აქ პოლიტიკა არაფერ შუაშია და ნურავინ დაუკავშირებს მომხდარს ჩემს პოლიტიკურ მოღვაწეობას. მოხდა ტრაგედია და დაიღუპა ახალგაზრდა. ჩემი შვილი კანონის წინაშე პირმართალი იქნება. თუ დამნაშავეა, მან პასუხი უნდა აგოს კანონის წინაშე. თუმცა მისი მსუბუქი ალკოჰოლის ქვეშ ყოფნა სხვა საკითხია და ამ ტრაგედიას უნდა გაემიჯნოს",-განაცხადა წერეთელმა. გიგი წერეთლის ინფორმაციით, პოლიციელების მხრიდან რაიმე უხეშობა ან სამსახურებრივი გადაცდომა არ ყოფილა და კორექტულად იქცეოდნენ. რაც შეეხება ნუგზარ წერეთელს, ის მთელი ღამის განმავლობაში დაკითხვაზე იმყოფებოდა, ახლა კი სახლშია. გიგი წერეთლის ინფორმაციით, მის შვილს, სავარაუდოდ, მსუბუქი ტვინის შერყევა აქვს და კისრის მალების გამოკვლევაც ჩაუტარდება.
