სასამართლო პროცესის დაწყებამდე ყოფილი თავდაცვის მინისტრის ადვოკატების განცხადებით, სასამართლოს გადაწყვეტილება გამამართლებელი იქნებოდა და ახალაია პატიმრობიდან გათავისუფლდებოდა. სასამართლოს ეზოში საპარლამენტო უმცირესობის წევრები, ნუგზარ წიკლაური, ჩიორა თაქთაქიშვილი, ხათუნა ოჩიაური იყვნენ მისულები. თუმცა, როგორც ბაჩო ახალაიას მეუღლე ანი ნადარეიშვილი facebook-ის საკუთარ გვერდზე წერს, დასრულდა სასამართლო პროცესი, თუმცა მოსამართლეს განაჩენი არ გამოუტანია და მისი თქმით, განაჩენის გამოცხადებამდე ერთი დღით დააანონსებს განაჩენის გამოტანის დღეს. შეგახსენებთ, საქმე ეხება სამხედრო მოსამსახურეებისთვის სიტყვიერი და ფიზიკური შეურაცხყოფის მიყენების, თავისუფლების აღკვეთის ეპიზოდებსა და ზვიად აბესაძესთან დაკავშირებულ ეპიზოდს, როდესაც მას პროკურატურის ინფორმაციით, სიტყვიერი და ფიზიკური შეურაცხყოფა მიაყენეს და თავისუფლება აღუკვეთეს. ბაჩო ახალაიასთან ერთად, აღნიშნულ პროცესზე ბრალდებულების გიორგი კალანდაძის, ალექსანდრე გორგაძის, ზურაბ შამათავას, მერაბ კიკაბიძის, მანუჩარ დარასელიასა და გიორგი კინწურაშვილის საქმეები განიხილება, თუმცა მათგან დარასელია და კინწურაშვილი მიმალვაში არიან და შესაბამისად, პროცესს არ ესწრებოდნენ.