რუსეთი არასოდეს დაუშვებს, რომ ვინმე მას სამხედრო ძალის თვალსაზრისოთ აღემატებოდეს. პუტინის ხელისუფლება ჯარის განვითარებასა და დაზვერვის გლობალური სისტემის შექმნას აპირებს.
„УНИАН"-ის ცნობით, ამის შესახებ ვლადიმერ პუტინმა ფედერალური კრებისადმი ყოველწლიურ მიმართვაში განაცხადა.
„არავის უნდა ჰქონდეს ილუზია, რომ შესაძლებელია, რუსეთს სამხედრო ძალის თვალსაზრისით გაუსწროს, - ჩვენ ამას არასოდეს დავუშვებთ. რუსეთი უპასუხებს ყველა ამ გამოწვევას: პოლიტიკურსაც და ტექნოლოგიურსაც. ჩვენ ამისათვის ყველანაირი პოტენციალი გაგვაჩნია", - განაცხადა რუსეთის პრეზიდენტმა.
მისივე თქმით, რუსეთში მშვენივრად აცნობიერებენ, რომ აშშ-ის რაკეტსაწინააღმდეგო თავდაცვის სისტემა მხოლოდ სახელწოდების კუთხითაა თავდაცვითი, რეალურად კი სტრატეგიული შეტევითი პოტენციალის მნიშვნელოვანი ნაწილია.
„შეშფოთებას იწვევს ასევე შეიარაღების ახალი სისტემების შექმნა, როგორიცაა მცირე სიმძლავრის ასაფეთქებელი ბირთვული მოწყობილობები, სტრატეგიული რაკეტები არაბირთვული შესრულებით, მაღალი სიზუსტის ჰიპერხმოვანი არაბირთვული სისტემები და სხვა", - აღნიშნა პუტინმა.
