სოფლის მეურნეობის მინისტრი შალვა ფიფია გურიისა და აჭარის რეგიონებში ციტრუსის მოსავლის აღება-დაბინავების პროცესს ეცნობა და მანდარინის გადამამუშავებელი საამქროების მონახულებას განაგრძობს.
სოფლის მეურნეობის სამინისტროს პრესსამსახურის ინფორმაციით, დღეს, შალვა ფიფიამ ოზურგეთის მუნიციპალიტეტის სოფელ მერიაში მოქმედი მანდარინის ჩამბარებელი პუნქტი დაათვალიერა და ადგილობრივ მოსახლეობას შეხვდა.
მოსახლეობასთან შეხვედრაზე ციტრუსის სეზონის მიმდინარეობა და მოსავლის რეალიზაციის საკითხები განიხილეს. მინისტრმა მოსახლეობას რაიონში არსებული ციტრუსის მიმღებ-გადამამუშავებელი პუნქტების შესახებ ინფორმაცია მიაწოდა.
"შეხვედრაზე მოვისმინეთ მოსახლეობის პრობლემები ციტრუსის რეალიზაციის კუთხით და მათი მოგვარების საკითხებზე ვიმსჯელეთ. გურიის რეგიონში მანდარინის მიმღები 3 პუნქტი სოფელებში შრომაში, მერიაში და ნატანებში ფუნქციონირებს. აჭარის რეგიონში ციტრუსს იბარებს 33 მიმღები და გადამამუშავებელი საამქრო, რომლებიც მზად არიან გურიის რეგიონიდანაც ჩაიბარონ მანდარინი. მოსახლეობას განვუმარტეთ თუ, რა დოკუმენტები სჭირდებათ, რომ მიიღონ სუბსიდია. მოსახლეობის იმ ნაწილის კი, ვისაც ციტრუსის ტრანსპორტირების პრობლემა აქვს, ჩვენ მზად ვართ დავახმაროთ შპს ,,მექანიზატორის" ტექნიკა, რათა დროულად შეძლონ მანდარინის გადამამუშავებელ პუნქტებამდე მიტანა", - განაცხადა შალვა ფიფიამ.
როგორც მოსახლეობასთან შეხვედრაზე შალვა ფიფიამ აღნიშნა, უკვე მოხსნილია ექსპორტთან დაკავშირებული პრობლემები, რომლებიც უამინდობამ გამოიწვია. უკვე ორი დღეა აღდგა საპორტო მოძრაობა.
მინისტრთან ერთად შეხვედრას ესწრებოდნენ სოფლის მეურნეობის მინისტრის მოადგილე დავით ნატროშვილი, ოზურგეთის მუნიციპალიტეტის გამგებელი კოტე შარაშენიძე, სოფელ მერიას საკრებულოს თავმჯდომარე ავთანდილ სურგულაძე და სოფლის მეურნეობის სამინისტროს ოზურგეთის რაიონული საინფორმაციო-საკონსულტაციო სამსახურის უფროსი გიორგი ჭყონია.
