ნოდარ ხადური "ნაციონალური მოძრაობის" მიერ ქვეყნის შიდა ვალთან დაკავშირებულ განცხადებას გამოეხმაურა.
"ნაციონალურმა მოძრაობამ" თავის ვალებს მიხედოს, რომელიც აიღეს - 500 მილიონი დოლარი, სრულიად უტვინოდ, ამ სიტყვის პირდაპირი მნიშვნელობით. რომ ჩამოიტანეს 500 მილიონი დოლარი, მერე კითხულობდნენ, სად დავხარჯოთ ეს ფულიო. თავიანთ თავს მიხედონ და თავიანთ დანგრეულ ქვეყანას, რომელსაც ახლა ჩვენ ვაშენებთ", - განაცხადა ფინანსთა მინისტრმა.
"ნაციონალური მოძრაობა" მიიჩნევს, რომ მთავრობის მიერ წარდგენილ ბიუჯეტში ძალიან დიდი მოცულობის ვალია, რომლის გადახდაც მომავალ თაობას მოუწევს.
როგორც "ნაციონალური მოძრაობის" პოლიტიკურმა მდივანმა ზურაბ ჯაფარიძემ დღეს გამართულ პრესკონფერენციაზე განაცხადა, პარტიამ 2014 წლის სახელმწიფო ბიუჯეტთან დაკავშირებით, არაერთხელ გამოხატა კრიტიკური მოსაზრება.
ჯაფარიძის თქმით, ერთი წლის წინ პარტია აფრთხილებდა ხელისუფლებას, რომ არასწორი ეკონომიკური პოლიტიკის შემთხვევაში, პრობლემები თავს იჩენდა ეკონომიკაში და ბიუჯეტშიც.
