მოძრაობა „ეროვნულების" ლიდერი სანდრო ბრეგაძე „ფეისბუქის" საკუთარ გვერდზე განცხადებას აკეთებს:
„ზვიადი და მერაბი! მათთვის „პრადოს" ისეთივე ღირებულება ჰქონდა,როგორც ასანთის ღერს. ამიტომაც მერაბს ერთი პიჯაკი ეცვა ციხიდან გამოსვლის შემდგომ, ხოლო კრიმინალებისაგან დევნილ პრეზიდენტს, სომხეთში ხელფასიდან შემორჩენილი 200 მანეთი აღმოაჩნდა ჯიბეში, რომელიც საჭმლის საყიდლად არ ეყოთ. ალბათ, ეს იყო „მიზეზი" იმისა, რომ ორივე ეროვნული გმირი მოკლეს. ქართველებმა მოკლეს, რათა კორუფციაში ჩაფლული, ფულზე დახარბებული, ყაჩაღობით და მკვლელობით გამდიდრებული ხალხი მოეყვანათ ხელისუფლებაში.
ამ უდიდესი ცოდვის ჩადენის შემდგომ ვიღაც გაბღენძილი, ქონისგან გასიებული, ფულიანი ერთუჯრედიანი არსება ბრძნული გამომეტყველებით მერაბისა და ზვიადის შეცდომებზე დაგვიწყებს საუბარს, თან არც შერცხვება და ბევრი ლაქია თავის ქნევით მოუსმენს.
5 წლის ნახმარ „მერსედესს" გადავაყოლეთ საქართველოს პრეზიდენტი და ამიტომაც ვისჯებით დღემდე, ამიტომაც ვუცქერთ „პრადოს" ჯიპზე გაგიჟებულ მდაბიოებს და ბნელი გვირაბის ბოლოს ნათელს ამაოდ ვეძებთ! როცა ერთ საუკუნეში, საუკუნის დასაწყისში ღვთისგან მოვლენილ წმინდანს ილია მართალს მოკლავ, ხოლო მეორე ნახევარში ორ წამებულ გმირს - ზვიადსა და მერაბს მოკლავ, არ უნდა გაგვიკვირდეს, რომ ცოდვებისათვის დავისაჯოთ!" - წერს ბრეგაძე.
