იურმალაში, კონკურსზე "ახალი ტალღა 2013" ქართველმა კონკურსანტმა სალომე ქათამაძემ მეორე ადგილი დაიკავა. კონკურსის გამარჯვებული, კუბელი რობერტო კელ ტორესი გახდა. მან სალომე ქათამაძეს მხოლოდ ერთი ქულით აჯობა. მესამე ადგილზე კი ვიეტნამის წარმომადგენელი ვინ ჰუატი გავიდა. კონკურსი, სამი ეტაპისგან შედგებოდა, პირველ ტურში მომღერლებმა მსოფლიო ჰიტები შეასრულეს, მეორეში მშობლიური სიმღერები, ხოლო ბოლო ტურში, სპეციალურად "ახალი ტალღისთვის" შექმნილი სიმღერები გაჟღერდა. საპრიზო ფონდი 100 ათას ევროს შეადგენს, პირველი ადგილის მფლობელი 50 ათასი ევროთი დაჯილდოვდება, მეორე ადგილის მფლობელი - 30 ათასს ევროს მიიღებს, ხოლო მესამე ადგილზე გასული მონაწილე - 20 ათასს. სპონსორებმა პრიზები მაყურებლის სიმპატიისთვისაც დააწესეს. გამარჯვებულთა დაჯილდოების ცერემონია იურმალაში დღეს საღამოს გაიმართება.
