„რეპორტიორის" პრესკლუბში გამართულ ბრიფინგზე არასამთავრობო ორგანიზაციების წარმომადგენლებმა, მედია-კავშირ „ობიექტივისთვის" წართმეული დეციმეტრული არხის დაბრუნების მოთხოვნით ბრიფინგი გამართეს. როგორც არასამთავრობო ორგანიზაცია „მოქალაქის" წარმომადგენელმა, ჟურნალისტმა ნინო ბორჩხაძემ განაცხადა, „ობიექტივი" ერთ-ერთი ყველაზე რეიტინგული ტელე-რადიო მაუწყებლობაა და მას განვითარების უფლებას უზღუდავენ.
„ობიექტივი" ეს არის ერთ-ერთი ყველაზე რეიტინგული, ყურებადი ტელე-რადიო მაუწყებლობა. ხელისუფლებამ უნდა გაითვალისწინოს ისიც რომ, რომ არა „ობიექტივის" თავდაუზოგავი ბრძოლა სამართლიანობისთვის და უკანონობის წინააღმდეგ, დღეს საქართველოში სულ სხვა რეალობა გვექნებოდა. მოუწოდებთ ხელისუფლებას, დაეხმაროს მედიაკავშირ „ობიექტივს", ვინაიდან კომუნიკაციების მარეგულირებელი ეროვნული კომისიის მხრიდან აშკარად აქვს ადგილი საკითხის გაჯანჯლებას და გადაუწყვეტლობას „ობიექტივისთვის" დეციმეტრული არხის დაბრუნებასთან დაკავშირებით. გარდა იმისა, რომ „ობიექტივს" უზღუდავენ მაუწყებლობას, ასევე ხელს უშლიან განვითარებაში და წინსვლაშიც", - განაცხადა ბორჩხაძემ.
ჟურნალისტმა ტელევიზიების მხრიდან არასოლიდარობა და საკითხის იგნორირებაც გააპროტესტა.
„ეს ცარიელი სკამები მახინჯ დამოკიდებულებაზე და მედიასაშუალების ხელოვნურად გარიყვის მცდელობაზე მიუთითებს. ესაა არაკოლეგიალურობა. „ობიექტივი" ყოველთვის სოლიდარულია, როცა რომელიმე მედიასაშუალებას პრობლემები ექმნება. მივიჩნევ, რომ დღეს სხვა მედიასაშუალებების მხრიდან ამ საკითხის იგნორირება არის დანაშაული", - განაცხადა ნინო ბორჩხაძემ.
