71 წლის ქუთაისელ ომარ ფანჩულიძეს  საგანგებო სიტუაციების  სამსახურისათვის ცრუ შეტყობინების მიწოდებისათვის ქუთაისის საქალაქო სასამართლომ 3 000 ლარის გადახდა დააკისრა. ფანჩულიძემ 112-ში დარეკა და განაცხადა, რომ ქუთაისში, საქართველოს პარლამენტის შენობაში ბომბი იყო და აფეთქდებოდა. როგორც topnews.ge-ს ომარ ფანჩულიძემ განუცხადა,  რამდენიმე თვეა ხელისუფლებას 400-ლარიანი თვალის ოპერაციის დაფინანსებას თხოვდა, თუმცა ოპერაცია არ დაუფინანსეს. „მივმართე პარლამენტს, ჯანდაცვის სამინისტროს, მთავრობას, თუმცა ოპერაცია არავინ დამიფინანსა. ამიტომ გადავწყვიტე დამერეკა და მეთქვა პარლამენტში ბომბიამეთქი.  ვიჯექი ტელევიზორთან და ვუყურებდი, ვირთხებივით როგორ გამორბოდნენ პარლამენტიდან დეპუტატები. საქალაქო სასამართლომ კი 3 000 ლარის გადახდა დამაკისრა, რასაც ვერ გადავიხდი, იმიტომ, რომ არ მაქვს. 3 000 ლარი, რომ მქონოდა 400 ლარიანი ოპერაციის დაფინანსებას კი არ ვითხოვდი",- განაცხადა ომარ ფანჩულიძემ.