ექსპერტმა ეკონომიკის საკითხებში ემზარ ჯგერენაიამ „რეპორტიორის“ პრესკლუბში გამართულ ბრიფინგზე განაცხადა, რომ უახლოეს მომავალში ლარის კურსის უფრო მეტად გაუფასურება მოსალოდნელი არ არის.
„ოქტომბერში და ნოემბერში ეროვნულმა ბანკმა მინიმალური რაოდენობით გაყიდა დოლარი. ეს იმას ნიშნავს, რომ ეროვნული ბანკი ინექციას არ აკეთებს, ის უყურებს ბაზარს. ბაზრის მოთხოვნა კი არის ის, რომ ლარი საკმაოდ დიდი რაოდენობით მოეწოდებოდა და ბუნებრივია, გაიზარდებოდა დოლარის კურსი. ლარის კურსის გაუფასურება გამოწვეულია იმითაც, რომ მიმოქცევაში გამოშვებულია მეტი ლარი. გაუფასურების ზრდა მოსალოდნელი არაა, პირიქით, იანვრის თვეში ლარის კურსი გამყარდება. პირველი დეკემბრის მონაცემებით, ბანკის აქტივები თითქმის 2 მილიარდით გაიზარდა. ასევე შარშანდელთან შედარებით, 100 მილიონი ლარით არის გაზრდილი ნოემებრში, ოქტომბერში და დეკემბერში წარმოებული იმპორტიც, რაც ძალიან მნიშნველოვანია ქვეყნისთვის“, - განაცხადა ემზარ ჯგერენაიამ.
