საქართველოს ეროვნული ბანკის პრეზიდენტის გიორგი ქადაგიძის განცხადებით, რომელიც 2013 წლის საქმიანობის შედეგების შემაჯამებელ პრესკონფერენციაზე გააკეთა, ფინანსური სტაბილურობა უზრუნველყოფილია, როგორც მიმდინარე, ისე საშუალო და გრძელვადიან პერიოდში.

მისი ინფორმაციით, 2013 წლის განმავლობაში საბანკო სექტორი სტაბილურ და ჯანსაღ განვითარებას განაგრძობდა.

„წლის განმავლობაში დეპოზიტები 25 პროცენტით გაიზარდა, მათ შორის ლარში დეპოზიტები - 50 პროცენტითაც. დეპოზიტების ასეთი ზრდა საბანკო სისტემისა და აბანკო სექტორის მიმართ მაღალ ნდობაზე მიუთითებს. სესხების ზრდა 15 პროცენტის ფარგლებშია. სულ, წლის განმავლობაში ბანკების აქტივები 18 პროცენტით გაიზარდა და 17 მილიარდ ლარს მიაღწია“, - განაცხადა ქადაგიძემ.

ეროვნული ბანკის პრეზიდენტის ინფორმაციით, ბოლო პერიოდში მნიშვნელოვნად განვითარდა ფინანსური ბაზრების კიდევ ერთი მიმართულება - მიკროსააფინანსო სექტორი, რომლის ჯამურმა აქტივებმა 800 მილიონ ლარს მიაღწია.

როგორხც გიორგი ქადაგიძემ განმარტა, შესაბამისად გაიზარდა მიკროსაფინანსო ორგანიზაციების მომხმარებელთა რიცხვიც. 

„ეროვნული ბანკი ცდილობს, ყურადღება მიაქციოს ამ ორგანიზაციების მომხმარებელთა უფლებების დაცვის საკითხს. განხორციელდა ორი მნიშვნელივანი ცვლილება - კომერციული ბანკების მსგავსად, მიკროსაფინანსო ორგანიზაციებსაც განესაზღვრათ რეფინანსირების განაკვეთის მაქსიმალური 2-პროცენტიანი ზღვარი; ასევე, მიკროსაფინანსო ორგანიზაციებს მოეთხოვებათ კლიენტებთან ხელშეკრულების სტანდარტიზაცია, რაც გულისხმობს ხელშეკრულების პირველ გვერდზე გარიგების ყველა მნიშვნელოვანი პუნქტის გამოტანას და გარიგების საგანთან დაკავშირებული ყველა ხარჯის დაანგარიშებას“, - აღნიშნა გიორგი ქადაგიძემ.