დღეს, 19:00 საათზე, თბილისის ისტორიის მუზეუმ „ქარვასლაში“ კულტურისა და ძეგლთა დაცვის მინისტრის პირველი მოადგილე მარინე მიზანდარი კულტურული მემკვიდრეობის დაცვის ეროვნული სააგენტოს არამატერიალური კულტურული მემკვიდრეობის 2013 წლის ანგარიშს მოისმენს და არამატერიალური კულტურული მემკვიდრეობის სფეროს სპეცილისტებთან წინასაახალწლო შეხვედრას დაესწრება.
როგორც „რეპორტიორს“ სამინისტროდან აცნობეს, კულტურული მემკვიდრეობის დაცვის ეროვნული სააგენტო არამატერიალური კულტურული მემკვიდრეობის დაცვისა და პოპულარიზაციის მიზნით, რამდენიმე წელია აქტიურად მუშაობს, რომლის შედეგად წელს „ქვევრის ღვინის დაყენების უძველეს ქართულ ტრადიციულ მეთოდს“ იუნესკომ მსოფლიო არამატერიალური მემკვიდრეობის სტატუსი მიანიჭა.
ღონისძიებაზე მოწვეულები არიან არამატერიალური კულტურული მემკვიდრეობის სფეროს განვითარების პროცესში მონაწილე სპეციალისტები.
არამატერიალური კულტურული მემკვიდრეობის დაცვისა და განვითარების მიზნით, კულტურული მემკვიდრეობის დაცვის ეროვნულმა სააგენტომ მუშაობა დაასრულა არამატერიალური კულტურული მემკვიდრეობის კანონპროექტზე. პარალელურად, უკვე დაგეგმილია სპეციალური ღონისძიებების ციკლი, რომელიც არამატერიალური კულტურული მემკვიდრეობის დაცვისა და გადარჩენისთვის, პროფესიული წრეების გარდა, სფეროში ფართო საზოგადოების მაქსიმალურ ჩართულობას და მონაწილეობას გულისხმობს.
