ოლეგ ოსინოვსკი, რომელიც ახლახან ესტონურმა ბიზნეს-გამოცემა Äripäev-მა ესტონეთის უმდიდრეს ადამიანად დაასახელა, აცხადებს, რომ საქართველოს ჰიდროენერგეტიკაში 200 მილიონ დოლარიან ინვესტიციას განახორციელებს.

ამის შესახებ ბიზნესმენმა ესტონურ გამოცემას, Eesti Päevaleht -ს გუშინ განუცხადა.

„საქართველო საუკეთესო ადგილია ჰიდროენერგეტიკაში ინვესტირებისთვის, რამდენადაც ამ ქვეყანაში 26 ათასი მდინარეა, რომლებიც მთებში იღებენ სათავეს“, -  განაცხადა ოსინოვსკიმ.

ბიზნესმენის თქმით, მისი კომპანია ააშენებს ოთხ ჰიდროელექტროსადგურს, რომლებიც 100 მეგავატ ელექტროენერგიას გამოიმუშავებენ წლიურად. თავად პროექტი კი, დაახლოებით 200 მილიონი დოლარი დაჯდება.

„ესტონეთში არ არის შესაძლებლობა, ამხელა თანხის ინვესტირება განახორციელო“, - განაცხადა ოსინოვსკიმ, რომლის ქონება 300 მილიონ ევროდ არის შეფასებული.

ოსინოვსკის მფლობელობაშია კომპანიები: Skinest Rail, რომელიც სარკინიგზო გადაზიდვებს ახორციელებს და წარმომადგენლობა აქვს საქართველოშიც. ასევე, Spacecom AS, რომელიც ვაგონ ცისტერნების ლიზინგს ახორციელებს.