დამოუკიდებლობის მოპოვების შემდეგ პირველად აზერბაიჯანმა საქართველოში საკუთარი წარმოების ბენზინის ექსპორტი შეწყვიტა.   

SOCAR Petrolium Georgia-ს გენერალური დირექტორი მაირ მამედოვი მოულოდნელ განცხადებას აკეთებს: მისი თქმით, კომპანია საწვავს რუმინული RomPetrol-სგან ყიდულობს. ამის მიზეზად მამედოვი ასახელებს იმ ფაქტს, რომ  ბოლო პერიოდში აზერბაიჯანს ბენზინის ექსპორტის რესურსი არ გააჩნია და ადგილობრივი სახელმწიფო ნავთობკომპანია ბენზინს მხოლოდ შიდა მოხმარებისათვის აწარმოებს.

მაირ მამედოვის განცხადებით, რუმინულმა ბენზინმა ქართული ბაზრიდან აზერბაიჯანული ბენზინი გააძევა.

SOCAR Petrolium Georgia-ს გენერალური დირექტორის ინფორმაციით,  გასულ წელს SOCAR Petrolium Georgia-მ რუმინული  RomPetrol-სგან 80-90 ათასი ტონა ბენზინი შეიძინა.

როგორც commersant.ge წერს, გამოცემა haqqin.az-ის ინფორმაციით დამოუკიდებლობის მოპოვების შემდეგ პირველად აზერბაიჯანმა საქართველოში საკუთარი ნედლეულით წარმოებული  საავტომობილო ბენზინის ექსპორტი შეწყვიტა.

სტატისტიკის მიხედვით აზერბაიჯანის „ევრო-2"-ის სტანდარტის ბენზინი რუმინული „ევრო-5" და „ევრო-6"-ის სტანდარტის ბენზინმა შეცვალა, წერს  აზერბაიჯანული გამოცემა.

2013 წლის დეკემბერში SOCAR-მა  52 ტონა საავტომობილო ბენზინის ექსპორტი განახორციელა, რაც 38-ჯერ ნაკლებია ვიდრე 2012 წელს განხორციელებული ექსპორტი. ამასთან, SOCAR-მა 2013 წელს ექსპორტზე გაიტანა ბენზინი, რომელიც ყაზახური ნავთობპროდუქტებისაგან იყო დამზადებული.