პრეზიდენტ, მიხეილ სააკაშვილის მხრიდან გამოთქმულ უკმაყოფილებას, იმის თაობაზე, რომ „ნაციონალური მოძრაობის" გენერალური მდივანი, ვანო მერაბიშვილი საპატიმროში ცუდ პირობებში იმყოფება, სასჯელაღსრულების მინისტრი, სოზარ სუბარი გამოეხმაურა.
„დღეს ადამიანის უფლებები არის დაცული. წამება არ ხდება. კვებასა და ჯანმრთელობასთან დაკავშირებული პრობლემები არის მოგვარებული ისე, როგორც არასდროს. ვანო მერაბიშვილი და ნებისმიერი პატიმარი იმყოფება ბევრად უკეთეს პირობებში, ვიდრე „ნაციონალები" ამყოფებდნენ ადამიანებს, თუმცა, ეს ცხადია, არ არის კემპინსკი და ის პირობები, რაც არის კემპინსკში არ იქნება მეცხრე დაწესებულებაში, არც მეჩვიდმეტეში და არც სხვაგან", - აღნიშნა სოზარ სუბარმა.
ამასთან, სუბარი ჟურნალისტებთან საუბარში ბიძინა ივანიშვილის მიერ უცხოური მედიისთვის მიცემულ ინტერვიუსაც გამოეხმაურა, რომელშიც პრემიერ-მინისტრი არ გამორიცხავს, რომ პოლიტიკიდან ახალ წლამდე წავიდეს. სუბარი განმარტავს, რომ აღნიშნული საკითხი მთავარია, რასთან დაკავშირებითაც ბიძინა ივანიშვილთან წინააღმდეგობა აქვს.
"მთავარი საკითხი, რაშიც პრემიერთან წინააღმდეგობა მაქვს, მისი სწორედ ის ხედვაა, რომ აპირებს დატოვოს თანამდებობა. მის შემცვლელზე ლაპარაკი ჯერჯერობით დაწყებული არ არის. ბიძინა ივანიშვილმა პოლიტიკაში შემოსვლა გადაწყვიტა უკიდურესი აუცილებლობის გამო, რადგან საჭირო იყო ქვეყნის გადარჩენა ავტოკრატიული მმართველობიდან. ეს იყო მისი ერთადერთი მიზანი და მაშინვე განაცხადა, რომ ის ხელისუფლებაში მხოლოდ წელიწადნახევრით ან ორი წლით დარჩებოდა. მე მაშინვე არ მომწონდა მისი განცხადების ეს ნაწილი, თუმცა ის ამბობს, რომ რჩება თავისი პრინციპის ერთგული. მე მგონია, რომ ბიძინა ივანიშვილი სჭირდება ქვეყანას იქ, სადაც ახლა არის, თუმცა მიმაჩნია, რომ უმთავრესი უკვე გააკეთა - ქვეყანა გაათავისუფლა ავტორიტარული მმართველობისგან", - აღნიშნა სოზარ სუბარმა.
