საკითხს პარლამენტის წინაშე მარეგულირებელი კომისიის საქმიანობის შემსწავლელი დროებითი საგამოძიებო კომისიის ხელმძღვანელი თინა ხიდაშელი სვამს, რომელმაც გუშინ, რიგგარეშე სხდომაზე, შუალედური დასკვნა წარადგინა. ხიდაშელი კვიტაიშვილის იმპიჩმენტის პროცედურის დაწყებას 6 აგვისტოს პლენარულ სხდომაზე გეგმავს.
როგორც დეპუტატი შესწავლილი მასალების საფუძველზე აცხადებს, ნათელია კომისიის მიერ უფლებამოსილებების დისკრიმინაციული და არაპროპორციული გამოყენება.
"მაგალითად "მაუწყებლობის შესახებ" კანონით კომისიას აქვს უფლება და ვალდებულება მონიტორინგი განახორციელოს ტელევიზიების მიერ საავტორო უფლებების დაცვაზე, რაც კომისიის მხრიდან არც ერთხელ გამოყენებული არ ყოფილა. ამასთან, "ეროვნული კომუნიკაციების შესახებ" კანონით - საკაბელოებთან მიმართებაში, მას ასეთი უფლება არ აქვს, მაგრამ ასეთ უფლებას იყენებდა. ამის გამოყენება კი დაიწყო მას შემდეგ, რაც მისთვის აქტუალური გახდა გმგ-ის (GMG) ლობირება. პრაქტიკულად ყველა პატარა საკაბელო კომპანიას ექმნებოდა პრობლემა და მათ 20-30 ათასი ლარის ოდენობის სანქციებს ადებდნენ, რათა ბაზრიდან გაეძევებინათ და გმგ მთავარ მონოპოლიურ მდგომარეობაში ყოფილიყო. ასევე ჩვენ ვნახეთ ძალადობის ფაქტები, როცა კომპანიასთან მარტივი გასაუბრება არ იყო საკმარისი და ადამიანების სისხლის სამართლებრივი დევნა ხორციელდებოდა. მაგალითად, შპს "მადის" ხელმძღვანელი იმის გამო დააპატიმრეს, რომ არ დათანხმდა ლიცენზიის გმგ-სთვის გადაცემას და გაუშვეს მას შემდეგ, რაც მისგან ასეთი თანხმობა მიიღეს. მან საკმაოდ წარმატებული ბიზნესი, როცა 3 ათასი აბონენტი ჰყავდა, უსასყიდლოდ გმგ-ის გადასცა. გარდა ამისა, იკვეთება პრობლემები, რომელიც წარმოეშვათ საკაბელო კომპანიებს, რათა ამოეღოთ "მაესტრო" პაკეტიდან. გარდა ამისა, 2008 წელს, როცა "მაესტრო" ლიცენზიის მოდიფიკაციას ითხოვდა, კომისიამ დასკვანში დაწერა, რომ "მაესტროს" უნდა ეთქვას უარი იმის გამო, რომ არ არსებობდა კვლევა, რომელიც დაადასტურებდა, თუ რა ტიპის ინტერესები ჰქონდა მოსახლეობას. შემდეგ კომისიამ შესაბამისი სოციოლოგიური კვლევის ჩატარებას მთელი სამი წელი მოანდომა. სამი წლის განმავლობაში პრაქტიკულად აკრძალული იყო ნებისმიერი ტიპის ლიცენზიის გაცემა, რითაც ხელოვნურად შეიზღუდა ამ მიმართულებით მეწარმეობის განვითარება და ამ სფეროში ახალი მოთამაშეების დაშვებას შეუშალა ხელი", - აცხადებს თინა ხიდაშელი.
გარდა ამისა, დეპუტატის თქმით, იკვეთება პრობლემები, რომელიც დაკავშირებულია კომისიის წევრების ინტერესთა კონფლიქტის არსებობასთან.
"ბატონი ირაკლი ჩიქოვანი სარეკლამო ბიზნესის პატრონი იყო. სამართლებრივად ამას ჰქვია ის, რომ წილი ჰქონდა მთავარ სარეკლამო კომპანიაში, რომელსაც სარეკლამო ბაზრის 90% ეკუთვნოდა. "რუსთავი "- სა და "იმედის" შემთხვევაში მუდმივად ხდებოდა, სარეკლამო კანონების, დადგენილი ლიმიტების დარღვევა და ამაზე არავინ რეაგირებდა, რადგან ეს მისი ინტერესი იყო", - აღნიშნა ხიდაშელმა, რომლის თქმითაც, იკვეთება ფაქტები, რაც პროკურატურის შესწავლის საგანი უნდა გახდეს.
პარლამენტი კომუნიკაციების მარეგულირებელი კომისიის საქმიანობის შემსწავლელ დროებით საგამოძიებო კომისიას უფლებამოსილების ვადას კიდევ რამდენიმე თვით გაუგრძელებს.
