ინტერნეტსივრცე აჭრელებულია სხვადასხვა სახის დიეტებით და რჩევებით, თუ როგორ დავიკლოთ წონაში, თუმცა დღეს პირიქით ვისაუბრებთ იმაზე, თუ როგორ მოვიმატოთ წონაში ისე, რომ არ დაირღვეს ორგანიზმში ფუნქციონალური ცვლა.
სამედიცინო თვალსაზრისით სხეულის მასისა და სიმაღლის თანაფარდობა ფასდება მასის ინდექსით. ამ ინდექსის დასადგენად წონა უნდა გაიყოს სიმაღლის კვადრატზე (კგ/მ2). თუ ამ ფორმულის მიხედვით თქვენი მასის ინდექსი ნორმაზე მცირეა, გირჩვეთ მიმართოთ დიეტოლოგს, რომელიც სრულფასოვანი გამოკვლევის ჩატარების შემდეგ მოგცემთ შესაბამის რეკომენდაციებს.
თუ თქვენი სიგამხდრე არაა გამოწვეული ორგანიზმში მიმდინარე რაიმე დარღვევის გამო და ჯანმრთელობა დამაკმაყოფილებელია, მაშინ უნდა მიმართოთ შემდეგ რჩევებს:
იმისათვის, რომ წონაში მოიმატოთ, რამდენიმე რჩევას მოგცემთ, თუმცა თავდაპირველად გეტყვით, რომ შეიძლება ადამიანი კარგად იკვებებოდეს, მაგრამ დღის განმავლობაში უწევდეს იმდენი ფიზიკური შრომა (ან ვარჯიში), რომ საკვების სახით მიღებულ კალორიებს და მეტსაც ხარჯავდეს (ასეთ შემთხვევაში იგი წონაში ვერ მოიმატებს და პირიქით, შეიძლება დაიკლოს კიდეც). ისეთ შემთხვევაში, თუ ცოტას შეჭამთ, მაგრამ დღის განმავლობაში ენერგიას საერთოდ არ დახარჯავთ, მაშინ არ არის გამორიცხული წონაში მატება. გარდა ამისა, შეიძლება ცოტას ჭამდე, მაგრამ კალორიულს (პურ-ფუნთუშეული, ცხოველური ცხიმი) და შეიძლება ბევრს ჭამდე, მაგრამ ნაკლებად კალორიულ პროდუქტებს (მაგალითად, ბოსტნეულს).
თუ წონაში მომატება გსურთ, მაშინ უნდა გაზარდოთ საკვების კალორიულობა და რაციონში შეიტანოთ ცილებითა და ნახშირწყლებით მდიდარი პროდუქტები. იკვებეთ ხშირ-ხშირად, საკვები საგულდაგულოდ დაღეჭეთ. სთხოვეთ მას, ვინც თქვენს კვებაზე ზრუნავს, სუფრა მადის აღმძვრელად გამოიყურებოდეს. გირჩევთ 2-3 კვირის განმავლობაში მიიღოთ კალციუმის ქლორიდის 10%-იანი ხსნარი - თითო სუფრის კოვზი 4-ჯერ დღეში. ამასთან ერთად მიიღეთ პოლივიტამინური პრეპარატი (მაგალითად: უნდევიტი, იუნიკაპი და სხვ.)
კიდევ რამდენიმე რჩევას მოგცემთ:
1. ყოველი კვების წინ დალიეთ ბოსტნეულის, ან ხილის წვენი, კარგია უალკოჰლო ლუდიც.
2. ჭამეთ დღეში არანაკლებ 5-6-ჯერ, კვებას შორის ერთნაირი შუალედები დაიცავით.
3.ნასადილევს დაისვენეთ, მშვიდად დაჯექით ან წამოწექით, მიეცით ორგანიზმს საკვების კარგად მონელების საშუალება.
4. ვისაც მომატება სურს, მისი მენიუ, როგორც უკვე გითხარით, უნდა იყოს ცილოვან-ნახშირწყოვანი. ამასთან მიღებული ცილების ნახევარს უნდა შეადგენდეს ხორცი, თევზი, კვერცხი. განსაკუთრებით სასარგებლოა ქათამი, მის ნაზ ხორცს ორგანიზმი ადვილად ითვისებს, მისი შემადგენელი ცილები კუნთებს სათანადო ფორმის მიღებაში ეხმარება. ყოველდღე ჭამეთ ხაჭო და თან მაღალი ცხიმიანობის, ასევე დალიეთ რძე, ჭამეთ მაწონი.
5. შეგიძლიათ მოამზადოთ სპეციალური ცილოვანი კოქტეილი. გახსენით 100 გრამი ხაჭო ერთ ჭიქა ნაღებში, დაამატეთ ერთი სუფრის კოვზი მურაბა ან თაფლი, ყველაფერი კარგად აურიეთ და მიირთვით. გემრიელიცაა და სასარგებლოც.
6. მზესუმზირის, ზეითუნის ან სიმინდის ზეთით კარგად შეაზავეთ სალათები. მათში შემავალი ე ვიტამინი დადებითად მოქმედებს ორგანიზმში მიმდინარე ნივთიერებათა ცვლაზე.
7. ცხიმოვანი ქსოვილის განვითარებას ცილებთან ერად ხელს ნახშირწყლებიც უწყობს. ამიტომ ჭამეთ თეთრი პური და მაკარონი, კარტოფილი, შაქარი, თაფლი, ტკბილეული.
8. ყურადღება მიაქციეთ, რომ თქვენი ყოველდღიური კვების რაციონი იყოს ბალანსირებული ვიტამინებისა და მიკროელემენების შემცველობითაც. საჭიროების შემთხვევაში მიიღეთ ვიტამინო-მინერალური კომპლექსი.
9. დღეში 2-3 ლ წყალი დალიეთ. ეს შეიძლება იყოს ჩაი რძით, ყავა ნაღებით, წვენები და წყალი.
10. მიუხედავად იმისა, რომ წონაში მომატება გჭირდებათ, ვარჯიშზე არ უნდა თქვათ უარი. დილა დაიწყეთ დილის გამამხნევებელი ვარჯიშებით, ძილის წინ ისეირნეთ სუფთა ჰაერზე და ძალიან კარგი იქნება თუ დაკავდებით სპორტით, მაგალითად ივლით ცურვაზე.
11. სიგარეტი, ალკოჰოლი და მით უმეტს ნარკოტიკები კატეგორიულად იკრძალება.
12. მნიშვნელოვანია ღამის სრულფასოვანი ძილი.
რაც შეეხება წყალს, წყალი არც ასუქებს და არც ახდუნებს, ყოველ ლუკმაზე წყლის მიყოლება არ შეიძლება. ასევე კარგი იქნება, თუ მიიღებთ დიდი რაოდებით ხილს. განსაკუთრებით ბანანს, ლეღვს ,მანგოს, ყურძენს, ხურმას.
სულ ეს იყო. იმედია დაგეხმარებათ სასურველი შედეგის მიღწევაში. ბოლო რჩევა კი ის არის, რომ ნუ მოინდომებთ სწრაფად შედეგის მიღებას. თვეში მხოლოდ 5 კილოგრამის მომატებაა მიზანშეწონილი.
(მოამზადა ლილუ მიროტაძემ)
