„ახალი მემარჯვენეები" განათლების ბიუჯეტის გაორმაგებას მოითხოვენ. ამ თემაზე პრესკონფერენცია გამართა პარტიის წევრმა მანანა ნაჭყებიამ. ის მასწავლებელთა სასერთიფიკაციო გამოცდების შედეგებს გამოეხმაურა და განაცხადა, რომ ცუდი შედეგები სწორედ დარგის არასწორმა დაფინანსებამ გამოიწვია. ნაჭყებიას აზრით მთლიანად უნდა შეიცვალოს პედაგოგთა პროფესიული განვითარების დაფინანსების მოდელიც.
„ის განცხადებები რომელიც გაკეთდა განათლების მინისტრის მხრიდან, რომ მათ აქვთ შემუშავებული სტრატეგია და ამ სტრატეგიის თანახმად ისინი მიმართავენ საგანგებო ზომებს, იმ სფეროში სადაც ეს ყველაზე მეტად სჭირდება მასწავლებელს, - ასე ჩვენ შორს ვერ წავალთ. ამას სჭირდება ძალიან სერიოზული გარღვევა, განათლების სფეროში. დაფინანსება მინიმუმ უნდა გაორმაგდეს და ბიუჯეტიდან არსებული დაფინანსების 8%-ის ნაცვლად, ის უნდა გახდეს 16%-ი,"- განაცხადა მანანა ნაჭყებიამ.
