უკრაინის თავდაცვის სამინისტროში აცხადებენ, რომ მომიტინგეებთან დაპირისპირებაში ქვეყნის შეიარაღებული ძალები მონაწილეობას არ მიიღებს. "მომიტინგეების წინააღმდეგ შეიარაღებული ძალები გამოყენებული არ იქნება. ყველა სამხედრო მოსამსახურე და ტექნიკა მუდმივი დისლოკაციის ადგილზე იმყოფება",- აცხადებენ თავდაცვის სამინისტროში.
კიევში, გრუშევსკის ქუჩაზე სიტუაცია დღის მეორე ნახევარში უკიდურესად მას შემდეგ დაიძაბა, რაც ძალოვანებმა მომიტინგეების განდევნა დაიწყეს. აქციის მონაწილეებმა "ბერკუტის" მისამართით ქვების და აალებადი ნივთიერებების სროლა დაიწყეს. "დინამოს" სტადიონთან მძიმე ტექნიკაც გამოჩნდა.
ძალოვანები მომიტინგეებს სასტიკად გაუსწორდნენ. უმოწყალოდ ნაცემი რამდენიმე ათეული მოქალაქე ქუჩაზე მთელი დღის განმავლობაში უყურადღებოდ იყო მიტოვებული.
დაშავებულმა დემონსტრანტებმა გაავრცელეს ინფორმაციაც, რომ "ბერკუტმა" მათ წინააღმდეგ ცეცხლსასროლი იარაღი გამოიყენა. ბოლო ინფორმაციით, დაღუპულია ხუთი და დაშავებულია რამდენიმე ასეული ადამიანი.
