"საერთაშორისო გამჭვირვალობა - საქართველოს" ხელმძღვანელი ეკა გიგაური დადებითად აფასებს უწყებათაშორის კომისიის იუსტიციის სამინისტროს დაქვემდებარებაში გადასვლას. ამის შესახებ მან უწყებათაშორისი კომისიის სხდომის დასრულების შემდეგ განაცხადა. რაც შეეხება დღევანდელ შეხვედრას, გიგაურის განცხადებით, გარკვეული მიმართულებებით რეკომენდაციების შემუშავება მნიშვნელოვანია. "ზოგადად, წარმატებული ფორმატია ის, რომ სხვადასხვა პოლიტიკური პარტიის აღმასრულებელი ხელისუფლების წარმომადგენლებს და სადამკვირვებლო ორგანიზაციებს აქვთ საშუალება, შეხვდნენ და ერთმანეთს გაუზიარონ შეხედულებები, თუ რა ხდება წინასაარჩევნო გარემოში. თუ შევადარებთ წინა წლების არჩევნებს, წინასაარჩევნო გარემო არის ბევრად უკეთესი", - აღნიშნა ეკა გიგაურმა. მისივე თქმით, არსებობს გარკვეული პრობლემები ადგილობრივ თვითმმართველობებში ბიუჯეტის შეცვლასთან დაკავშირებით და ამ მიმართულებით რეკომენდაციები შემუშავდება. გიგაურის აზრით, ასევე მნიშვნელოვანია, რომ შს სამინისტრო უფრო ეფექტური იყოს და სხვადასხვა აგრესიული ქმედებები აღკვეთოს.
