საქართველოს პრეზიდენტი დღეს საპარლამენტო უმცირესობისა და გუბერნატორებთან შეხვედრაზე საქართველოში აზერბაიჯანის ოპოზიციის წარმომადგენელთა შეკრების ფაქტს გამოეხმაურა და მთავრობის წარმომადგენლებს მსგავსი საკითხებში სიფრთხილისკენ მოუწოდა. მიხეილ სააკაშვილის განცხადებით, აზერბაიჯანის ოპოზიციის წარმომადგენლები, რომლებიც საქართველოში შეიკრიბნენ, რუსეთის დაკვეთით მოქმედებენ. "გუშინ და გუშინწინ საქართველოში პრეზიდენტ ილჰამ ალიევის ოპონენტების შეკრება გაიმართა, რომლებიც აქ მოსკოვიდან ჩამოვიდნენ. პოლიტიკური აქტიურობის უფლება ყველას აქვს, ჩვენ დემოკრატიული, თავისუფალი ქვეყანა ვართ, მაგრამ ძალიან კარგად ვიცით, რომ ამ კონკრეტულ ადამიანებს რუსეთის ფედერაციის უშუალო ხელმძღვანელობა მართავს და აფინანსებს. ეს ხალხი მათ მიერ შემოგდებულია იმ კონკრეტული მიზნით, რომ აზერბაიჯანში პოლიტიკური სტაბილურობა არ გაგრძელდეს. აზერბაიჯანის პოლიტიკური სტაბილურობა საქართველოს პოლიტიკური სტაბილურობის საწინდარია. საქართველო არის პატარა, დელიკატურ მდგომარეობაში მყოფი ქვეყანა. ჩვენ გვყავს მეზობლად სომხეთი, აზერბაიჯანი. ვფიქრობ, ჩვენი ტერიტორია არ უნდა იქნას გამოყენებული რაიმე სახის პოლიტიკური მანიპულაციებისთვის ჩვენი მეზობლების წინააღმდეგ. ამ საკითხში ჩვენ ძალიან ფრთხილი უნდა ვიყოთ. ჩვენ პოლიტიკურად თავისუფალი ქვეყანა ვართ, სადაც ადამიანს საკუთარი აზრის გამოთქმა შეუძლია. აზერბაიჯანთან ურთიერთობა, ისევე, როგორც სომხეთთან და თურქეთთან ურთიერთობა, უკიდურესად დელიკატური თემაა საქართველოსთვის და ძალიან მნიშვნელოვანია, რომ ამ ურთიერთობებს გავუფრთხილდეთ", - განაცხადა საქართველოს პრეზიდენტმა.
