ნოდარ ხადური კომპანია „LAZARD"-ის წარმომადგენლებს შეხვდა. მხარეებმა საქართველოს პრემიერ-მინისტრ ირაკლი ღარიბაშვილსა და კომპანიის აღმასრულებელ დირექტორს შორის დავოსში გამართული შეხვედრის მნიშვნელობასა და სამომავლო თანამშრომლობის პერსპექტივაზე ისაუბრეს.
როგორც ფინანსთა მინისტრთან გამართულ შეხვედრაზე აღინიშნა, კომპანია საქართველოს ბიზნეს-გარემოს შესწავლას და ქვეყანაში ინვესტიცების დაბანდების შესაძლებლობას აქტიურად განაგრძობს. ნოდარ ხადურმა კომპანიის წარმომადგენლებს მადლობა გადაუხადა იმ დაინტერესებისთვის, რომელსაც მსოფლიოში ერთ-ერთი ცნობილი საფინანსო-საკონსულტაციო კომპანია იჩენს საქართველოს მიმართ და იმედი გამოთქვა, რომ თანამშრომლობა გაგრძელდება.
"LAZARD" დამოუკიდებელი საფინანსო-საკონსულტაციო და აქტივების მართვის ერთ-ერთი წამყვანი კომპანიაა, რომელიც 1848 წელს დაარსდა. კომპანია 26 ქვეყნის 40 ქალაქში საქმიანობს. სათაო ოფისები ნიუ-იორკში, პარიზსა და ლონდონში მდებარეობს. კომპანიის შემოსავალმა 2012 წელს 1971 მილიონი აშშ დოლარი შეადგინა.
