დღეს, მართლმადიდებელი ეკლესია ღირსი ექვთიმე აღმსარებელის (ერისკაცობაში ევსტათე კერესელიძე) ხსენების დღეს აღნიშნავს.
ამასთან დაკავშირებით, 10:00 საათდან სრულიად საქართველოს კათოლიკოს-პატრიარქი, უწმინდესი და უნეტარესი, ილია მეორე საღმრთო ლიტურგიას სამების საკათედრო ტაძარში აღავლენს.
ღირს ექვთიმე აღმსარებელს დიდი წვლილი მიუძღვის უძველესი ქართული საგალობლების გადარჩენასა და შენახვაში.
იგი1865 წელს რაჭაში, სოფელ სადმელში დაიბადა. მან ცნობილი მომღერალისა და მუსიკოსისგან ფილიმონ ქორიძისგან ევროპული სანოტო დამწერლობა შეისწავლა და არა ერთი ნივმებით დაწერილი უძველესი ქართული საგალობლები ხუთხაზიან სანოტო სისტემაზე გადაიტანა. ესტატე კერესელიძეს განსაკუთრებული ნიჭი და ლამაზი კალიგრაფია აღმოაჩნდა და ფილიმონ ქორიძემ საგალობელთა სანოტო ხელნაწერების გადათეთრება მას მიანდო.
1912 წელს ესტატე კერესელიძე გელათის მონასტერში მორჩილად განწესდა. 1913 წლიდან კი მისი ყველაზე დაძაბული მოღვაწეობა დაიწყო. მან გადაწყვიტა, ზედმიწევნით მოეწესრიგებინა ფილიმონ ქორიძის ნოტებზე გადატანილი საგალობლები და ტიპიკონის მიხედვით გაეწყო, ამიტომ მრავლად შეიძინა სანოტო ფურცლები და შეუდგა ხელნაწერი ნოტების მოწესრიგებასა და გადათეთრებას.
1921 წელს, ქუთაისში კომუნისტური ხელისუფლების მისვლისთანავე მამა ექვთიმე დააპატიმრეს, როგორც ახალი წყობისათვის არასაიმედო პიროვნება. თუმცა, ბრალდების არქონის გამო რამდენიმე თვეში გაათავისუფლეს.
1923 წელს გელათის მონასტრის დახურვის შემდეგ, მამა ექვთიმემ მოახერხა საგალობლების კრებულები ჯერ ქუთაისში ერთ-ერთ ოჯახში გადაემალა, შემდეგ კი მოგვიანებით მარტომ ურმით მცხეთაში ჩამოიტანა. იმის გამო, რომ კომუნისტებს უძველესი ქართული საგალობლები არ გაენადგურებინათ, მამა ექვთიმემ სანოტო კრებულები საგულდაგულოდ ჯერ სვეტიცხოველში, შემდეგ კი ზედაზნის მონასტერში გადამალა. დიდ რკინის ყუთებში საიმედოდ დაცული მიწაში დაფლა.
1929-44 წლებში მამა ექვთიმე ზედაზნის მონასტერში მოღვაწეობდა.
1935 წლის ნოემბერში მან სახელმწიფო მუზეუმს გადასცა 34 სანოტო კრებული, რომელიც 6000-მდე საგალობლისგან შედგებოდა.
ყველა ეს საგალობელი ამჟამად კორნელი კეკელიძის სახელობის ხელნაწერთა ინსტიტუტშია დაცული.
