თავდაცვის მინისტრმა ცოტა ხნის წინ სამინისტროში პრესკონფერენციაზე მისულ ჟურნალისტებს განუცხადა, რომ ავღანეთში მივლენილი ჯარისკაცები უსაფრთხო ადგილზე გადაიყვანეს.

„გუშინწინ ავღანეთიდან ბოლო მივლენილი დელეგაცია დაბრუნდა.  ის ორი სამხედრო ბაზა, რომელიც უნდა დახურულიყო, უკვე დაიხურა. ჯარისკაცები გადასული არიან სხვა დისლოკაციის ადგილზე. ამ დროისთვის, ჩვენს სამხედროებს მისიის შესრულება ბევრად უსაფრთხო გარემოში მოუწევთ. შესაძლებლობების მაქსიმუმი გავაკეთეთ, რომ უზრუნველგვეყო არსებულ პირობებში ჩვენი ჯარისკაცების მისიის უსაფრთხოება“, –განაცხადა ალასანიამ.

შეგახსენებთ,რომ მას შემდეგ, რაც გასულ შემოდგომაზე სამხედროების რაოდენობა თითქმის გააორმაგა, საქართველო სამხედრო ძალების ყველაზე მსხვილი კონტრიბუტორი ქვეყანა გახდა ნატოს არაწევრ სახელმწიფოებს შორის. ამჟამად, მათი რიცხვი 1 560–ს აღემატება. საქართველომ  თავისი სამხედროები ავღანეთის ოპერაციაში მონაწილეობისთვის, პირველად, 2004 წელს გაგზავნა. მაშინ, ავღანეთის საპრეზიდენტო არჩევნების უსაფრთხოების უზრუნველყოფის მიზნით, 50 ჯარისკაცი ხანმოკლე ვადით მსახურობდა გერმანული სარდლობის მეთვალყურეობით.