საარჩევნო საკითხებზე მომუშავე ინტერფრაქციული ჯგუფის მიერ შემუშავებული საკანონმდებლო ცვლილების მიხედვით, არჩევნებში მონაწილე პარტიები და საარჩევნო ბლოკები ვალდებულები ხდებიან წინასაარჩევნო რეკლამისთვის ბიუჯეტიდან განსაზღვრული თანხის არანაკლებ 15% სულ ცოტა შვიდ რეგიონულ მაუწყებელს გამოუყონ. აღნიშნული საკანონმდებლო ცვლილება პარლამენტში ინიცირებისთვის მზადაა.
არჩევნების წელს, პოლიტიკური პარტიებისთვის სატელევიზიო რეკლამის განთავსების ხარჯების დასაფარად ბიუჯეტიდან ისინი დამატებით დაფინანსებას მიიღებენ.
კანონპროექტის მიხედვით, საზოგადოებრივი მაუწყებელი, აჭარის ტელევიზია და რადიო ვალდებულნი ხდებიან კვალიფიციური სუბიექტის გარდა, ყველა დანარჩენი პარტიისა და საარჩევნო ბლოკის წინასაარჩევნო რეკლამის განთავსების მიზნით გამოყონ დრო და დროის განაწილების წესი დგინდება. კერძოდ, ადგილობრივი მაუწყებლები ვალდებულნი ხდებიან წინასაარჩევნო რეკლამა უსასყიდლოდ განათავსონ, თუ მისი მომსახურების ზონაში მიმდინარე საარჩევნო კამპანიის დროს იგი ფასიან წინასაარჩევნო რეკლამას განათავსებს. ასეთ შემთხვევაში მაუწყებელი ვალდებული ხდება, პარტიის მიერ გავრცელებული ფასიანი რეკლამის ჯამურ დროზე სულ ცოტა 3-ჯერ მეტი დრო გამოუყოს უფადო წინასაარჩევნო რეკლამის განსათავსებლად.
უსასყიდლოდ გამოყოფილ დროში მაუწყებელი არადისკრიმინაციულად უნდა მიუდგეს თითოეულ კვალიფიციურ სუბიექტს.
