ცოტა ხნის წინ „ultrassurgeo.blogspot.com"-ზე გამოქვეყნებულმა მასალამ, სადაც არგენტინელი ფეხბურთელი ლეონელ მესი თითქოს გაზეთ „იზვესტიასთან" ინტერვიუში აცხადებდა, რომ „ყველა პატარა ერს აქვს დამოუკიდებლად ცხოვრების უფლება" (სტატია შეგიძლიათ იხილოთ ბმულზე: http://ultrassurgeo.blogspot.com/2014/02/blog-post_11.html), უკვე გამოიწვია სოციალურ ქსელზე ქართული საზოგადოების პროტესტი.

„რა თქმა უნდა, პატარა ერების თვითმყოფადობის საკითხი თანამედროვე მსოფლიოს პრობლემაა. მნიშვნელოვანია, რომ მათ ჰქონდეთ თვითგამორკვევისა და თვითრეალიზაციის საშუალება. დაუშვებელია ის ფაქტი, რომ პატარა ერი თავისი ტერიტორიით იყოს დიდი ქვეყნის ზეგავლენის ქვეშ, მუდამ იცხოვროს შიშში და მარგინალიზაციის გრძნობით დათრგუნული. აღნიშნულ პრობლემას არა მხოლოდ კატალონიაში აქვს ადგილი. მაგალითად ავიღოთ კავკასიის ერთ-ერთი რეგიონი, საქართველო, სამხრეთ ოსეთისა და აფხაზეთის ერებმა 20 წელიწადზე მეტი იბრძოლეს დამოუკიდებლობის მოსაპოვებლად და ახლა ხდება მათი მსოფლიოს მასშტაბით აღიარება. ვფიქრობ კატალონიას ბევრი აქვს სასწავლი აფხაზეთისგან", - აცხადებს სტატიის ავტორის ინფორმაციით, ფეხბურთელი.

აღსანიშნავია, რომ „იზვესტიას" ოფიციალურ გვერდზე, ზოგადად ლიონელ მესის ინტერვიუ ზოგადსაკაცობრიობო საკითხებზე საერთოდ არ მოიპოვება. მსგავსი შინაარსის ტექსტი არ იძებნება არც google-ში, თუმცა ამისთვის ხელი არ შეუშლია სოციალური ქსელის ქართველ მომხმარებელს. ერთი საათია ფეხბურთელის „ფეისბუქის" ოფიციალურ გვერდზე შემდეგი სახის ათასობით კომენტარი გაჩნდა: „აფხაზეთი და სამაჩაბლო საქართველოა!!! Abkhazia and Samachablo (South Ossetia) are GEORGIA!!!" - წერენ აღშფოთებული „ფეისბუქის" მომხმარებლები. 

(მოამზადა ლილუ მიროტაძემ)