იუნესკოს გენერალური კონფერენციის 2011 წლის 3 ნოემბრის გადაწყვეტილებით, 13 თებერვალი რადიოს მსოფლიო დღედ გამოცხადდა. სწორედ 13 თებერვალს გავიდა პირველად ეთერში გაერთიანებული ერების ორგანიზაციის რადიო, რომელიც 1946 წლიდან მაუწყებლობს.

ტელევიზიისა და ინტერნეტის ხანაში რადიო კვლავ რჩება ინფორმაციის ყველაზე ხელმისაწვდომ წყაროდ, რომ არაფერი ვთქვათ მის საგანმანათლებლო ფუნქციასა და შეუცვლელ როლზე სტიქიური თუ სხვა სახის უბედურებების დროს.

რადიოს საერთაშორისო დღესთან დაკავშირებით, იუნესკოს შექმნილი აქვს ვებ-გვერდი. იქ მოიძიებთ ინფორმაციას 13 თებერვალს დაგეგმილი ღონისძიებების შესახებ. რადიოწამყვანთა მიმართვებს, აუდიო-რეპორტაჟებს.

იუნესკო აღნიშნავს, რომ რადიომაუწყებლობა ყველაზე უნივერსალური მედიასაშუალებაა, მისი აუდიტორია მსოფლიო მოსახლეობის 95%-ს შეადგენს. ელექტროკავშირის საერთაშორისო ორგანიზაციის მონაცემებით, მსოფლიოს განვითარებად ქვეყნებში, დაახლოებით 75%-ს გააჩნია ერთი რადიომიმღები მაინც.

(მოამზადა ლილუ მიროტაძემ)