საქართველოს ოფიციალური ვიზიტით „გაეროს მოსახლეობის ფონდის" აღმასრულებელი დირექტორი და გაეროს გენერალური მდივნის მოადგილე ბაბატუნდე ოსოტიმეჰინი ეწვია.
დღეს, „გაეროს მოსახლეობის ფონდის" აღმასრულებელი დირექტორი თბილისში, ამავე ფონდის კიბოს სკრინინგის პროგრამის ძირითად პარტნიორს - ეროვნულ სკრინინგ-ცენტრს დაათვალიერებს.
ოსოტიმეჰინი, ფონდის აღმოსავლეთ ევროპისა და ცენტრალური აზიის რეგიონულ შეხვედრაში მიიღებს მონაწილეობას. იგი ასევე, სკრინინგ-ცენტრის თანამშრომლებსა და "გამარჯვებულ ქალთა კლუბის წევრებს" შეხვდება, რომლებიც თავიანთი გამოცდილებისა და საქმიანობის შესახებ ისაუბრებენ.
ხვალ დაგეგმილ შეხვედრაზე კი, ბაბატუნდე ოსოტიმეჰინი „გაეროს მოსახლეობის ფონდის" ოფისებისა და ეროვნული ბიუროების 110-მდე მონაწილესთან ერთად, რეგიონისთვის გაეროს მოსახლეობის ფონდის 2014 წლის პრიორიტეტებს განიხილავს.
„გაეროს მოსახლეობის ფონდი" მრავალი წელია, თანამშრომლობს საქართველოს მთავრობასთან ძუძუსა და საშვილოსნოს ყელის კიბოს პრევენციისა და ადრეული გამოვლენის თანადაფინანსების კუთხით.
ფონდის მოღვაწეობის მიზანია, ისეთი გარემოს შექმნა, სადაც ყოველი ორსულობა არის სასურველი, ყოველი მშობიარობა - უსაფრთხო და ყოველ ახალგაზრდას აქვს შესაძლებლობა, სრულად გამოავლინოს თავისი პოტენციალი.
