ტელეწამყვანმა დიმიტრი შეპელიევმა, რომელიც მომღერალ ჟანა ფრისკეს მეუღლეა, სამსახურს თავი დაანება. მიზეზი კი ისაა, რომ მას სურს, მთელი თავისი დრო ფრისკეს მოსავლელად გამოიყენოს.
შეპელიევი არათუ ახალ კონტაქტებზე ამბობს უარს, არამედ რამდენიმე ადრე დადებული ხელშეკრულებაც გააუქმა. წამყვანმა უკრაინული არხი „ინტერიც“ დატოვა.
შეგახსენებთ, მომღერალ ჟანა ფრისკეს სიმსივნე აქვს. ამის შესახებ მის ოფიციალურ საიტზე გამოქვეყნებულ ფრისკეს მეუღლის, შოუმენ დიმიტრი შეპელოვის განცხადებაშია ნათქვამი. ზუსტად რა დაავადებაზეა საუბარი, პუბლიკაციაში ნათქვამი არაა. მედიის ცნობით, ფრისკეს ტვინის აგრესიული ავთვისებიანი სიმსივნე აქვს.
მომღერალი 15 იანვარს სამკურნალოდ გერმანიაში გადააფრინეს. ის შერემეტიევოს აეროპორტის სამედიცინო პუნქტში შენიშნეს. ერთ-ერთ რუსულ პორტალს თვითმხილველმა მიაწოდა ვიდეოჩანაწერი, სადაც მძიმე მდგომარეობაში მყოფი მომღერალი საკუთარ თავს არ ჰგავს. ფრისკეს თან ახლდა მისი მეუღლე, დიმიტრი შეპელოვი. მომღერლის გარემოცვის ინფორმაციით, ჟანა ფრისკე გერმანიის ერთ-ერთ საუკეთესო კლინიკაში გადაიყვანეს სამკურნალოდ. აქ მსოფლიოს წამყვანი ექიმი-ონკოლოგები მუშაობენ.
გასული წლის აპრილში რუსული შოუ-ბიზნესის სექს-სიმბოლომ მაიამიში იმშობიარა და ვაჟი გააჩინა, რის შემდეგაც ჟანა საზოგადოების ყურადღების მიღმა აღმოჩნდა. ზაფხულში ვარსკვლავის სცენაზე დაბრუნება იურმალას კონკურსის, „ახალი ტალღის“ ფარგლებში იგეგმებოდა, თუმცა, როგორც ჩანს, ჯანმრთელობის მდგომარეობის გაუარესების გამო მომღერალმა სცენაზე გამოსვლა ვერ შეძლო.
(მოამზადა ლილუ მიროტაძემ)
