საპენსიო რეფორმის ფარგლებში, ეკონომიკის სამინისტროში საპენსიო ოფისი იქმნება. ამის შესახებ ჟურნალისტებს საქართველოს ფინანსთა მინისტრმა ნოდარ ხადურმა განუცხადა. საქმე ეხება სტრატეგია „საქართველო 2020“-ის პროექტის იმ ნაწილს, რომლის თანახმად, მთავრობის მიერ დაგეგმილი საპენსიო რეფორმა სავალდებულო დაგროვებითი საპენსიო სისტემის ჩამოყალიბებას ითვალისწინებს.
„ძალიან რთულია ამ რეფორმის დაწყება, ვინაიდან საპენსიო რეფორმა ზოგადად არის ძალიან გრძელვადიანი პროცესი. ეკონომიკის სამინისტროში იქმნება საპენსიო ოფისი, რომელიც ზუსტ დროში გაწერს ყველა იმ ღონისძიებას, რომელზეც საუბრობდით, მათ შორის დაფინანსების ალტერანტიული წყაროების მოძიებას“, - აღნიშნა მინისტრმა.
ცნობისთვის: „სტრატეგია 2020“-ის თანახმად, მთავრობა გეგმავს საპენსიო სისტემის ეფექტიანობის ზრდის მიზნით, განახორციელოს დაგროვებით საპენსიო სისტემაზე გადასვლის შესაძლებლობების ანალიზი. ამასთან, საშუალო პერიოდში მთავრობა გეგმავს დააკავშიროს საბაზო საპენსიო დახმარების ზრდა ინფლაციის მაჩვენებელთან, რათა პროგრამის ფარგლებში შენარჩუნებული იყოს მსყიდველობითი უნარის არსებული დონე.
