„მსოფლიო ბანკმა საქართველოს სოციალურ-ეკონომიკური განვითარების სტრატეგიის პროექტს  „საქართველო 2020“-ს  დადებითი შეფასება მისცა“, - ამის შესახებ მსოფლიო ბანკის მთავარმა ეკონომისტმა ევროპისა და ცენტრალური აზიის რეგიონში ჰანს თიმერმა ნოდარ ხადურთან შეხვედრის შემდეგ განაცხადა.

შეხვედრას ასევე ესწრებოდნენ მსოფლიო ბანკის რეგიონული დირექტორი სამხრეთ კავკასიის ქვეყნებში ჰენრი კერალი და სიღარიბის დაძლევის და ეკონომიკური მართვის ლიდერი რაშნი შანქარი, რომლებთან ერთადაც „საქართველო 2020“-ის პროექტის განხილვა მოხდა.

„განვიხილეთ ის პროგრესი, რომელსაც საქართველომ წლების განმავლობაში მიაღწია, ვისაუბრეთ მსოფლიო ბანკთან მუშაობის საკითხებზე.  მოხარული ვარ, რომ მთავრობის სტრატეგია ასახავს იმ სამ სფეროს, რომლის განვითარებაც ჩვენც გვქონდა გუნებაში“, - განაცხადა ჰანს თიმერმა.

ფინანსთა მინისტრის ნოდარ ხადურის განცხადებით, სტრატეგიის პროექტი იმას ითვალისწინებს, რომ ქვეყნის ეკონომიკა უფრო კონკურენტუნარიანი  იყოს.

„სტრატეგიაში ძირითადი მიმართულებები უკვე გაწერილია, მაგრამ ასევე იქმნება დარგობრივი დოკუმენტები და მინდა გითხრათ, რომ ძალიან ბევრი საინტერესო პროცესია, რაც საქართველოს სწორი გზით განვითარებას ადასტურებს“, - განაცხადა ფინანსთა მინისტრმა.

ხვალისთვის დაგეგმილ მაღალი დონის პოლიტიკურ ფორუმს სახელწოდებით „ეკონომიკური ზრდის გამოწვევები საქართველოსთვის“  მსოფლიო ბანკის მთავარი ეკონომისტიც დაესწრება.