„ქართულ-აფხაზური და ოსური საერთაშორისო მოძრაობის" ლიდერმა ნესტან კირთაძემ „რეპორტიორის" პრესკლუბში საარჩევნო გარემოზე და ამ არჩევნების შემდეგ, ზოგიერთი პოლიტიკური პარტიის პოლიტიკური ასპარეზიდან გაქრობის საშიშროებაზე გაამახვილა ყურადღება.
„როდესაც საუბარია საპარლამენტო არჩევნებზე, ადგილობრივი თვითმმართველობის წარმომადგენლობით ორგანოებზე, მაშინ საინიციატივო ჯგუფები სრულიად ფუჭია. მაჟორიტარები არიან აბსოლუტურად უფუნქციო, ზედმეტი დანამატები პოლიტიკურ სისტემაში, რომლებიც არაფერს არ უკეთებენ თავის ხალხს და მას ხელისუფლება ყოველთვის თავის სასარგებლო გადაწყვეტილებების მისაღებად იყენებს", - განაცხადა კირთაძემ.
როგორც კირთაძე აღნიშნავს, იგი მრავალპარტიულობის მომხრეა, თუმცა ამასთანავე იმ ორპარტიულ პოლიტიკურ სისტემაზე საუბრობს, რომელიც მისი აზრით, სხვა პოლიტიკური პარტიების პოლიტიკური ასპარეზიდან გაქრობას შეუწყობს ხელს.
„საქართველოში უკვე შეიქმნა ორპარტიული პოლიტიკური სისტემა. ახლა, კოდექსი და გარემო მთლიანად მორგებული იქნება ამ სისტემის შენარჩუნების და კიდევ უფრო გაძლიერებისათვის. თუკი პოლიტიკური პარტიები არ იქნებიან ყურადღებით, როგორც დემოკრატიული ინსტიტუტები, ისინი მხოლოდ ინტერესთა კლუბებად გადაიქცევიან და მრავალპარტიული პოლიტიკური სისტემა საქართველოში გაქრება", - აღნიშნა ნესტან კირთაძემ.
