ცენტრალური საარჩევნო კომისია პარლამენტს მიმართავს  საარჩევნო კოდექსში ინიცირებული ცვლილებების ნაწილი არ დაამტკიცოს. კერძოდ, ცესკოში მიიჩნევენ, რომ კონკრეტული ნორმა, რომლის თანახმადაც კენჭისყრის დღეს კენჭისყრის შენობასა და მიმდებარე ტერიტორიაზე აგიტაციის გაწევა 500 ლარით დაჯარიმდება, მიმდებარე ტერიტორიად  კი, საარჩევნო უბნის შენობიდან 20 მეტრის რადიუსით არსებული მონაკვეთი განისაზღვრება, მხოლოდ პრობლემური საჩივრების რაოდენობას გაზრდის,  საარჩევნო გარემოს  კი, არ გააუმჯობესებს. , ,როდესაც კანონმდებლობით შემზღუდავი ნორმა შემოდის, აუცილებლად უნდა ვიფიქროთ ერთის მხრივ მის საჭიროებაზე და მეორეს მხრივ - აღსრულების მექანიზმზე. აქედან გამომდინარე  ჩნდება კითხვები: რა მნიშველობა აქვს, ღია სივრცეში, შენობის გარეთ, გარკვეული ქმედება 19 მეტრის დაშორებით განხორციელდება, თუ 21 მეტრის დაშორებით? ვინ უნდა აკონტროლოს დაშორების მანძილი? სავარაუდო საჩივრების შემოტანის შემთხვევაში,  როგორ უნდა მოხდეს მისი განხილვა და ვინ უნდა ამტკიცოს საარჩევნო უბნის შენობიდან რა მანძილის დაშორებით მოხდა აგიტაციის ფაქტი? საუბნო საარჩევნო კომისიებს ამის შესაძლებლობა არ აქვთ. მათი საქმე კენჭისყრის დღეს პროცედურების შესრულებაა, რაც შენობის შიგნით უნდა მოხდეს“,- აღნიშნულია განცხადებაში.