საქართველოს პარლამენტის აგრარულ საკითხთა კომიტეტის თავმჯდომარე გიგლა აგულაშვილი აგროსექტორში განხორციელებული სამუშაობის შედეგად სხვადასხვა მიმართულებით გაზრდილ მაჩვენებლებს აქვეყნებს.
როგორც „რესპუბლიკური პარტიის" კონფერენციაზე აგულაშვილმა აღნიშნა, 2013 წელს ქვეყანამ აგროსექტორში მნიშვნელოვან წარმატებებს მიაღწია, რისი ნათელი მაგალითიც აგროპროდუქტების ექსპორტის 51 პროცენტიანი ზრდაა.
მისი თქმით, 2012 წელს აგროპროდუქციის ექსპორტი 513 მილიონი დოლარი იყო, 2013 წელს კი ექსპორტის მაჩვენებელმა 774 მილიონ დოლარს მიღწია.
აგრარულ საკითხთა კომიტეტის თავმჯდომარე სხვა წარმატებებზეც ამახვილებს ყურადღებას და „ქართული ოცნების" მიერ დაპირებების შეუსრულებლობასთან დაკავშირებით „ნაციონალურ მოძრაობას" ცრუ ბრალდებებში ადანაშაულებს.
„უფრო დეტალური ინფორმაციისთვის გეტყვით, რომ 2012 წელთან შედარებით 2013 წელს 20 პროცენტით მეტი მიწის ფართობი დამუშავდა. 2012 წელს მოხნული ფართობების რაოდენობა 260 000 ჰა-ს არ აღემატებოდა, 2013 წელს კი 310 000 ჰა მიწის ფართობი დამუშავდა. 2013 წელს მშპ-ს 1.3 პროცენტიანი ზრდა დაფიქსირდა და 9.7 პროცენტს მიაღწია . სამჯერ არის გაზრდილი გაცემული იაფი აგროკრედიტების რაოდენობა. 2012 წელს სულ 70 მილიონი ლარის ოდენობის იაფი აგროკრედიტი გაიცა, 2013 წელს კი - 240 მილიონამდე.
სამჯერ გაიზარდა სასოფლო სამეურნეო სავარგულების ირიგაცია და 74000 ჰა-ს გადააჭარბა. 25 500 ჰა მიწის ფართობზე გაკეთდა და რეაბილიტირდა სადრენაჟო სისტემა რაც , 2012 წელთან შედარებით 14 000 ჰა-თი მეტია.
ოთხჯერ გაიზარდა ბიზნესოპერატორების ინსპექტირება სურსათის ეროვნული სააგენტოს მიერ. 2013 წელს 2016-მდე ინსპექტირება განხორციელდა. 100 პროცენტით არის გაზრდილი ღვინის ექსპორტი. 2012 წელს 23,4 მლნ ბოთლი ღვინის ექსპორტი მოხდა, 2013 წელს კი - 46 მლნ ბოთლის. 72 პროცენტითაა გაზრდილი გადამუშავებული ყურძნის რაოდენობა. 2012 წელს თუ 52 200 ტონა ყურძნის გადამუშავება მოხერხდა, 2013 წელს მისმა საერთო რაოდენობამ 90 ტონა შეადგინა. ორჯერ არის გაზრდილი მანდარინის ექსპორტიც. 2013 წელს 42 201 ტონა მანდარინის ექსპორტი მოხდა", - განმარტავს გიგლა აგულაშვილი.
აგრარულ საკითხთა კომიტეტის თავმჯდომარის განცხადებით, სახელმწიფო აქტიურად ზრუნავს სოფლის მეურნეობის დარგში სამეცნიერო კვლევების ხელშეწყობაზეც.
მისი თქმით, ამ მიმართულებით უკვე გამოყოფილია 6,8 მილიონი ლარი.
„დაგეგმილია სსიპ „სოფლის მეურნეობის სამეცნიერო კვლევითი ცენტრის შექმნა. 19 მუნიციპალიტეტში მოეწყობა ჯიშთა გამოცდის ქსელი და სასელექციო მეურნეობები, ჯიშების გამოცდა, შეიქმნება თანამედროვე ტექნიკით აღჭურვილი ნიადაგური კვლევის ლაბორატორია, პრობლემების გაანალიზების, თანამედროვე, ინოვაციური ტექნოლოგიებისა და მეთოდოლოგიის დანერგვით იგეგმება მოსავლიანობის ზრდა. მოხდება სურსათის უვნებლობის, ვეტერინარიისა და მცენარეთა დაცვის სფეროებში რისკის შეფასების უზრუნველყოფა, საუკეთესო პრაქტიკისა და სამეცნიერო გამოცდილების საშუალებით. ცენტრის ძირითადი ბაზა იქნება ვაზისა და ხეხილის სარგავი მასალის წარმოების ეროვნული ცენტრში (ჯიღაურას მეურნეობა), რომელიც ბიძინა ივანიშვილმა სოფლის მეურნეობის სამინისტროს გადაეცა ", - აცხადებს გიგლა აგულაშვილი.
