ექსპერტი ემზარ ჯგერენაია საქართველოს ფინანსთა მინისტრის, ნოდარ ხადურის განცხადებას გამოეხმაურა, სადაც მინისტრი ქვეყნის ეკონომიკაში დაფიქსირებული პოზიტიური ტენდენციების შესახებ საუბრობს. „რეპორტიორთან" საუბარში ექსპერტი აღნიშნავს, რომ რამდენიმე დღეში თებერვლის თვის ეკონომიკური ზრდის ტენდენციის ზუსტი პროცენტულობაც გახდება ცნობილი, რომელიც სავარაუდოდ, წინა თვეს არ ჩამოუვარდება.
„საქართველოში ეკონომიკის თვალსაზრისით ნამდვილად კარგი ტენდენციები იყო იანვარში. სავალუტო კურსის გამო მოხდა ეკონომიკის პროვოცირება და საკმაოდ მაღალ 8%-მდე ავიდა ზრდის მაჩვენებელი, ექსპორტი კი 27%-ით გაიზარდა. ძალიან მნიშვნელოვანია, რომ წინასწარი მაჩვენებლებით სავაჭრო ბრუნვა შეადგენდა მილიარდ ევროს. ანალოგიური ტენდენციები გაგრძელდა თებერვალშიც. საერთოდ, იანვარი და თებერვალი ბიზნესისთვის მძიმე თვეებია, ასე, რომ ამ ფონზე საკმაოდ დადებითი ტენდენციები გამოიკვეთა", - ამბობს ჯგერენაია.
