როგორც საქართველოს საგარეო საქმეთა სამინისტროდან აცხადებენ, ტურნირში მონაწილეობას იღებენ საქართველოს სამთავრობო უწყებების და საქართველოში აკრედიტებული დიპლომატიური მისიების გუნდები.
უწყების ცნობით, საფეხბურთო ტურნირის ჩატარების იდეა საქართველოს საგარეო საქმეთა სამინისტროს ეკუთვნის, რომელთან ერთად ღონისძიების ორგანიზატორები არიან საქართველოს სპორტისა და ახალგაზრდობის საქმეთა სამინისტრო და საქართველოს ფეხბურთის ფედერაცია.
„მნიშვნელოვანია, რომ ტურნირს აქვს საქველმოქმედო ფუნქცია, რომელიც გულისხმობს საქართველოში საოკუპაციო ხაზთან მდებარე სოფლების 10 საჯარო სკოლისთვის სასკოლო და სასპორტო ინვენტარით აღჭურვას“, - აცხადებენ სამინისტროში.
ტურნირში მონაწილეობას 16 გუნდი იღებს. გახსნის ცერემონია თბილისის სპორტის სასახლეში 7 მარტს შედგა და მას საგარეო საქმეთა მინისტრი მაია ფანჯიკიძე და სპორტისა და ახალგაზრდობის მინისტრი ლევან ყიფიანი დაესწრნენ. ტურნირის დასკვნითი შეხვედრები, დახურვის და დაჯილდოების ცერემონია 9 მარტს, სპორტის სასახლეში ჩატარდება.
ნომინაციებში გამარჯვებულებს მთავრობის წარმომადგენლები და ვეტერანი ფეხბურთელები დააჯილდოვებენ. ტურნირის ფინალურ მატჩს საოკუპაციო ხაზის გასწვრივ მდებარე სოფლების საჯარო სკოლების მოსწავლეები დაესწრებიან.
