საქართველოს კალათბურთის ეროვნულ ნაკრებს ისევ იგორ კოკოშკოვი უხელმძღვანელებს. როგორც კალათბურთის ეროვნულ ფედერაციაში აცხადებენ, თანამშრომლობის გაგრძელებასთან დაკავშირებით, შეთანხმება მიღწეულია.
ახალი ხელშეკრულების თანახმად, კოკოშკოვი საქართველოს ნაკრებს 2014 და 2015 წლების მატჩებში უხელმძღვანელებს.
შეგახსენებთ, რომ იგორ კოკოშკოვი საქართველოს ნაკრებთან 2008 წლიდან მუშაობს, როცა ნაკრები ევროპის B დივიზიონში ასპარეზობდა. სერბი თავკაცის ხელმძღვანელობით კალათბურთის ეროვნული ნაკრები პირველივე ციკლში A დივიზიონში გადავიდა, საიდანაც ევროპის ჩემპიონატის ფინალურ ეტაპზე გავიდა.
2011 წელს ლიტვაში გამართულ ევრობასკეტზე საქართველოს კალათბურთის ნაკრები კონტინენტის 11 საუკეთესო გუნდს შორის მოხვდა. 2013 წელს სლოვენიაში გამართული ევროპის ჩემპიონატის თამაშების შემდეგ იგორ კოკოშკოვს საქართველოს კალათბურთის ფედერაციასთან ხელშეკრულება ამოეწურა.
ცნობისთვის: საქართველოს კალათბურთის ფედერაციას ნაკრების მწვრთნელობის კანდიდატად კიდევ ერთ სერბ სპეციალისტს განიხილავდა, თუმცა არჩევანი კვლავ კოკოშკოვზე შეჩერდა. მოლაპარაკებები 10 მარტს დასრულდა.
