ექსპერტი ეკონომიკის საკითხებში, დემურ გიორხელიძე ენერგო ტარიფებთან დაკვშირებით კახი კალაძის განცხადებას ეხმაურება. როგორც მან „რეპორტიორთან" აღნიშნა ენერგო ტარიფებთან მიმართებაში არაფერი არ გაკეთებულა, რისი გაკეთებაც შესაძლებლი იყო. შეგახსენებთ, კახი კალაძემ გორის მუნიციპალიტეტში გუშინ გამართულ შეხვედრაზე ენერგო ტარიფებზე ისაუბრა. მისის თქმით ტარიფების შემცირების კუთხით ამ ეტაპზე მაქსიმუმია გაკეთებული.
„ეს მინისტრი რეებს ურევს ერთმანეთში, - რა მიზნით?! არაფერიც არ გაკეთდა, რაც გასაკეთებელი იყო და რისი გაკეთებაც შეიძლებოდა! და, რომ არ გაკეთდა, ეს კალაძის სისუტეა, პირველ რიგში!
3 თვე ინტენსიურად ვეწინააღმდეგებოდი ამ ნახევარ-ღონისძიებებს, რაც გაატარეს. ეს იყო მთავრობის პირველი აშკარად გამოვლენილი სისუსტე - ტარიფები!
ცხადია, ინტერესთა ჯგუფებმა ზეწოლა მოახდინეს მთავრობაზე და უზარმაზარი მოგებები გარანტირებული გახადეს. კიდევ უფრო სასაცილო დაკლება ბუნებრივ აირზე მოხდა. მაშინ, როცა მე დეტალური გაანგარიშებები გადავეცი საზოგადოებრივ მაუწყებელს, ხმა ვერ ამოიღეს და 5 თეთრით შეამცირეს მხოლოდ."
ექსპერტის აზრით, ქვეყანაში ადამიანები დამოუკიდებელი ეკონომიკური საქმიანობის დაწყებას ვერ ახერხებენ, რადგან მთავრობის მხრიდან ხელშეწყობა არ აქვთ.
„ათასობით ადამიანი ვერ ახერხებს დამოუკიდებელი ეკონომიკური საქმიანობის დაწყებას, რადგან ფინანსები ხელმიუწვდომელია, მთავრობას არანაირი ხელშემწყობი პროგრამები არ აქვს ე.წ. 'სტარტ-აპპ"-ისთვის. საკანონმდებლო ცვლილებებიც სუსტია. წინა ხელისუფლებასთან ასოცირებული მონოპოლური ჯგუფები, რომლებმაც გასულ წელს 7 მილიარდ ლარამდე სუფთა მოგება მიიღეს, არ აქტიურობენ და სიტუაციას ელიან. ფული კონცენტრირებულია მახინჯ საბანკო სისტემაში. ასეთ პირობებში რა უნდა ქნან ადამიანებმა?"- განაცხადა დემურ გიორხელიძემ.
