საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში, ზურაბ აბაშიძე, სააგენტო „რეპორტიორთან“ გენადი ონიშენკოს დღეს გაკეთებულ განცხადებებთან დაკავშირებით კომენტარს აკეთებს. „ქართული ღვინო ნელ-ნელა შედის რუსულ ბაზარზე. უკვე მაღაზიებშიც გამოჩნდა. ბატონ ონიშენკოსაც მოსწონს, რადგან დღეს უკეთესი ხარისხია, ვიდრე ადრე იყო. ესაა იმ დიალოგის  შედეგი, რომელიც საქართევლოს მთავრობის და პირადად პრემიერ-მინისტრის ინიციატივით დაიწყო“,– აღნიშნა აბაშიძემ. ზურაბ აბაშიძის განცხადებით, მიმდინარეობს პროცესები იმ ჩიხიდან გამოსასვლელად, რომელშიც რუსეთ-საქართველოს ურთიერთობა 2008 წლის აგვისტოს ომის შემდეგ აღმოჩნდა. „ახლა ვსაუბრობთ არა ურთიერთობის დათბობაზე, არამედ იმაზე, თუ როგორ გამოვიდეთ იმ ჩიხური მდგომარეობიდან, რომელშიც 2008 წლის შემდეგ აღმოვჩნდით. პროგრესი, წარმატება ასეთ ტერმინებს ჯერჯერობით არ ვხმარობთ, რადგან ახლა მხოლოდ არსებული მდგომარეობიდან გამოსვლის მცდელობებია.“ შეგახსენებთ, ონიშენკო რუსეთში წარდგენილი ქართული ღვინის ხარისხით კმაყოფილია. თუმცა აცხადებს, რომ ქართული ღვინის იმპორტი რუსულ ბაზარზე დიდ გავლენას ვერ მოახდენს. „პრინციპში, კმაყოფილი როგორ უნდა ვიყო, როდესაც საუბარი ალკოჰოლს ეხება? თუმცა ღვინის ის პარტიები, რომლებიც მოწმდება, დასაშვებ ნორმებში ჯდება“,– აღნიშნა ონიშენკომ.